Maaşınızı açıqlamaq ailə və yaxın çevrədə gözləntiləri artıra bilər

İnsanların ən çox maraqlandığı şəxsi məsələlərdən biri də gəlirləridir. Bəziləri maaşını ailəsi və yaxın dostları ilə bölüşsə də, digərləri bunu şəxsi məlumat hesab edərək gizli saxlamağa üstünlük verir. Bəs maaşı açıqlamaq daha faydalıdır, yoxsa onu gizli saxlamaq?

Valyuta.az xəbər verir ki, maaşın açıqlanmasının həm müsbət, həm də mənfi tərəfləri var. Gəlir barədə məlumat vermədikdə insanlar xərclərinizə görə sizi daha az mühakimə edir. Bu halda həm qənaətcil, həm də daha sərbəst həyat tərzi seçmək mümkün olur. Maaşın gizli saxlanılması ailə və yaxın çevrədə yarana biləcək əlavə gözləntilərin də qarşısını ala bilər.

Bundan əlavə, bəzi insanlar diqqət mərkəzində olmağı sevmədikləri üçün gəlirlərini bölüşmək istəmirlər. Maaşın açıqlanmaması şəxsi həyatın məxfiliyini qorumağa və əlavə təzyiqlərdən uzaq qalmağa kömək edir.

İşəgötürənlər də çox vaxt əməkdaşların maaşlarını açıqlamamasını üstün tuturlar. Çünki eyni vəzifədə çalışan şəxslərin fərqli maaş alması iş yerində narazılıq, qısqanclıq və gərginlik yarada bilər. Maaş fərqləri isə iş təcrübəsi, əlavə bacarıqlar, ixtisaslaşma və şirkətdə çalışma müddəti kimi amillərlə bağlı ola bilər.

Digər tərəfdən, maaşın açıqlanmasının da müəyyən üstünlükləri var. Mütəxəssislər hesab edirlər ki, əməkhaqqı barədə açıq danışmaq insanların əmək bazarındakı real vəziyyəti görməsinə və əməkhaqqı danışıqlarında daha məlumatlı olmasına kömək edir. Bu, həm də işçilərin ədalətli əməkhaqqı alıb-almadığını müəyyən etməyə imkan verir.

Məqalədə qeyd olunur ki, dünyada gender maaş fərqinin üzə çıxmasında da əməkhaqlarının açıqlanması mühüm rol oynayıb. Məsələn, 2019-cu ildə BBC aparıcısı Samira Ahmed həmkarı Ceremi Vayn ilə müqayisədə xeyli az maaş aldığını öyrəndikdən sonra məsələ ictimai müzakirəyə çıxarılıb.

Nəticə etibarilə, maaşı açıqlamaq və ya gizli saxlamaq şəxsi seçimdir. Hər iki yanaşmanın öz üstünlükləri və riskləri var. Qərar verərkən həm şəxsi məxfiliyi, həm də bunun sosial və peşəkar nəticələrini nəzərə almaq tövsiyə olunur.

Sərvanə Rəmixanova