"Nəhəng şirkətlər reklamı televiziya və sosial şəbəkə vasitəsilə etmirlər" - Marketoloq

Müasir dünyada reklam sanki uğurun əsas şərti kimi qəbul olunur: daha çox görünmək, daha çox danışılmaq və daim diqqət mərkəzində qalmaq. Amma maraqlıdır ki, bu qaydanı pozan və buna baxmayaraq güclü mövqeyini qoruyan nəhəng brendlər də var. Bəzilərinə görə, bu brendlər hətta reklam etmədən, əlçatmazlıq hissi yaradaraq yenə də gündəmdə qalmağı bacarır.

Bəs doğrudanmı nəhəng brendlər özlərini reklam etmir və bu yolla əlçatmaz qalırlar?

Marketoloq Elnur Salehov Valyuta.az-a bildirib ki, bəzi nəhəng brendlərin reklam vermədiyi düşünülsə də, əslində, onlar reklam verirlər:

“Sadəcə, bu reklamlar insanların öyrəşdiyi televiziya və ya sosial şəbəkə reklamları formasında olmur. Yəqin ki, hər kəs Formula 1 yarışlarına baxıb. Orada tez-tez “Rolex” və digər böyük brendlər görünür. Bu da öz növbəsində reklam sayılır. Sadəcə, insanlar televiziya və sosial şəbəkələrdəki reklamlara daha çox alışdığı üçün reklamı yalnız həmin formada qəbul edirlər. Halbuki hər hansı bir şəhərdə, tədbirdə və ya yarışda brend adının görünməsi də onun tanıtımıdır. Bu, daha çox xatırlatma reklamı hesab olunur. Yəni brend bu yolla “mən varam” mesajını verir”.

“Məsələ reklamın olub-olmamasında deyil, reklamın harada və necə görünməsindədir. Məsələn, “Ferrari” avtomobillərini istehsal edərkən onları müəyyən limitlə bazara çıxarır. Bəs niyə? Çünki şirkətin əsas məqsədi yalnız daha çox pul qazanmaq deyil, daha dəyərli görünməkdir. Məhdud sayda istehsal olunan məhsul daha xüsusi və prestijli qəbul edilir. “Ferrari”nin alıcıları da adətən tanınmış şəxslər, milyonerlər və kolleksiyaçılar olur. Bu da brendin daha çox tanınmasına və nüfuzunun artmasına səbəb olur. Eksklüzivlik və əlçatmazlıq hissi isə məhdud istehsal, müştərilərin seçilməsi və yüksək qiymət siyasəti ilə yaradılır. Bütün bu amillərin birləşməsi nəticəsində brend daha eksklüziv və daha arzuolunan görünür”, – deyə marketoloq qeyd edir.

Tənzilə Ağabalayeva