“PAŞA Kapital İnvestisiya Şirkəti”nin investisiya qiymətli kağızları 52% azalıb

“PAŞA Kapital İnvestisiya Şirkəti” 2025-ci ili 2,54 milyon manat xalis mənfəətlə başa vurub.

Valyuta.az xəbər verir ki, şirkətin mənfəəti illik müqayisədə 12,9% və ya 290,7 min manat artıb.

2024-cü ildə şirkətin xalis mənfəəti 2,25 milyon manat olub.

Hesabata əsasən, şirkətin cəmi aktivləri ötən illə müqayisədə 1,1% artaraq 64,78 milyon manata çatıb. Bununla yanaşı, investisiya qiymətli kağızları portfeli 52,3% və ya 17,9 milyon manat azalaraq 16,35 milyon manata düşüb. Bir il əvvəl bu göstərici 34,29 milyon manat təşkil edib.

Şirkətin cəmi öhdəlikləri isə 3% azalaraq 46,12 milyon manat olub. 2024-cü ilin sonunda bu rəqəm 47,56 milyon manat idi.

2025-ci ildə effektiv faiz dərəcəsindən istifadə etməklə hesablanmış faiz gəlirləri 19,8% azalaraq 3,64 milyon manata enib.

Faiz xərci 1,25 milyon, qeyri-faiz gəlirləri 7,26 milyon, qeyri-faiz xərcləri isə 6,37 milyon manat təşkil edib. 

Mayya Hüseynova