Səyahət sığortası nələri qarşılamır?

Xaricə səfər edən zaman vətəndaşlar özlərini müxtəlif risklərdən qorumaq üçün səyahət sığortasına müraciət edirlər. Lakin bir çox hallarda sığorta əldə olunsa da, onun konkret hansı vəziyyətlərdə işə düşdüyü tam aydın olmur.

Bəs sığortalanmışıqsa, hansı hallarda səyahət sığortasından istifadə edə bilərik? 

Mövzu ilə bağlı Valyuta.az-a danışan sığorta eksperti Kamran Babayev bildirir ki, səyahət sığortası əsasən qəfil və gözlənilməz halları əhatə edir: “Bu sığorta növü daha çox səfər zamanı baş verən qəfil sağlamlıq problemləri və bədbəxt hadisələr üzrə təminat verir. Yəni əvvəlcədən planlaşdırılmış müalicə məqsədilə həkimə müraciətlər sığorta çərçivəsinə daxil deyil. Eyni zamanda, sərxoş vəziyyətdə baş verən hadisələr və sığorta müqaviləsində qeyd olunan digər istisna halları üzrə də ödəniş həyata keçirilmir”.

Ekspertin sözlərinə görə, səyahət sığortası könüllü sığorta növü olduğundan, onun əhatə dairəsi və istisnalar sığorta şirkətindən asılı olaraq dəyişə bilər. Bununla yanaşı, bəzi ölkələrin səfirlikləri viza verilməsi üçün sığorta müqaviləsinə xüsusi tələblər qoyur:

"Səfər sığortası əsasən viza alınan zaman səfirliklər tələb etdiyi üçün əldə edilir. Lakin xaricdə tibbi xərclər gözləmədiyimiz qədər yüksək ola bilər. Ona görə bu çox vacib sığorta növüdür və hər kəsə tövsiyə edirəm ki, xaricə səfər edərkən sığortalansınlar,” - deyə ekspert əlavə edib.

Xatırladaq ki, cari ilin yanvar-fevral aylarında Azərbaycanda səyahət sığortası üzrə yığımlar 1 milyon 210 min manat təşkil edib. Bu, ötən ilin eyni dövrü ilə müqayisədə 539 min manat və ya 80,32% çoxdur.

Hesabat dövründə sığorta ödənişləri isə 322 min manat olub ki, bu da illik müqayisədə 59 min manat və ya 6,07 dəfə artım deməkdir.

Sərvanə Rəmixanova