İranda iqtisadiyyata "internet zərbəsi" - Zərər açıqlandı

İran Ticarət Palatasının Bilik əsaslı iqtisadiyyat komissiyasının sədri Əfşin Kolahi ölkədə internetin beynəlxalq şəbəkəyə çıxışının məhdudlaşdırılmasının iqtisadiyyata vurduğu zərəri açıqlayıb.

Valyuta.az-ın məlumatına görə, İran Ticarət Palatasında keçirilən iclasda çıxış edən Kolahi bildirib ki, internet kəsintisinin birbaşa gündəlik zərəri 30-40 milyon dollar, dolayı zərəri isə təxminən 70-80 milyon dollar civarındadır.

İranlı rəsmi qeyd edib ki, bu zərər gündə iki elektrik stansiyasının dəyərinə bərabərdir və bu zərər ölkənin (müharibədən asılı olmayaraq) özünə vurduğu iqtisadi itkidir.

Məlumata görə, İranda beynəlxalq internetə çıxış son illərdə ilk dəfə 2025-ci il 28 dekabrda iqtisadi problemlərlə bağlı başlayan və sonradan rejim əleyhinə etirazlara çevrilən hadisələr fonunda bir aydan çox müddətə məhdudlaşdırılmışdı.

İranın Rabitə və İnformasiya Texnologiyaları naziri Səttar Haşimi 2026-cı il 26 yanvarda verdiyi açıqlamada həmin kəsintinin ölkə iqtisadiyyatına gündəlik təxminən 34,5 milyon dollar zərər vurduğunu bildirmişdi.

Məlumatlara görə, ABŞ-İsrail hücumlarının başladığı 28 fevraldan bəri İranda 46 gündür beynəlxalq internetə çıxışın olmadığı qeyd olunur.

Paşa Məmmədli