Avropada bu il gözlənilmədən populyarlıq qazanan 3 heyrətamiz şəhər

Getdikcə daha çox səyahətçi Avropanın az tanınan məkanlarını seçərək orijinal təəssüratlar axtarır və standart marşrutlardan uzaqlaşır. 

Valyuta.az xəbər verir ki, "Travel Off Path" nəşri bu il öz tarixinin ən yaxşı mövsümünü yaşayan 3 heyrətamiz Avropa şəhərini açıqlayıb.

Qeyd olunur ki, bu şəhərlər hələlik Paris və Barselona kimi nəhəng turist izdihamı ilə qarşılaşmır. Sosial şəbəkələrdə onlar haqqında az danışılır, bu isə onları daha sakit və rahat şəkildə kəşf etməyə imkan verir.

Vrotslav: Polşanın yeni rəngarəng mərkəzi

Polşada turistlər üçün ən populyar şəhər hələ də Varşavadır. Lakin təcrübəli səyahətçilər Vrotslava diqqət yetirməyi tövsiyə edir. Hazırda bu şəhər ölkədə turist istiqamətləri arasında dördüncü yerdədir.

Nəşrin məlumatına görə, Vrotslav son illərdə rəngarəng fasadlı küçələri, nağılvari körpüləri və Avropada ən sərfəli qiymətlərdən biri ilə Polşanın əsas görməli yerlərindən birinə çevrilib.

Göttingen: Almaniyanın gizli incisi

Nəşr qeyd edir ki, Münhen artıq turistlərlə doludur, Frankfurt isə digər böyük şəhərlərdən fərqlənmir. Əsl Almaniyanı görmək istəyən səyahətçilərə Göttingen şəhəri tövsiyə olunur.

Göttingendə turistlər orta əsr ab-havasını qoruyan köhnə şəhəri, rəngarəng yarımtaxta evlərlə bəzədilmiş küçələri və canlı bar mühitini kəşf edə bilərlər.

Kopenhagen: Köhnə dünya cazibəsi olan sahil şəhəri

Nəşr bildirir ki, Kopenhagen həm alış-veriş imkanları, həm də müasir mətbəxi və köhnə dünya cazibəsi ilə seçilən sahil şəhəridir. Təkcə mart ayında buraya 2,6 milyon turist səfər edib.

Turistlərə Kopenhageni velosipedlə gəzmək tövsiyə olunur. Bu, şəhərdə ən populyar nəqliyyat vasitəsidir.

Səyahətçilərə xəbərdarlıq edilir ki, Kopenhagendə qiymətlər yüksəkdir. Bir fincan amerикano təxminən 8 dollar, sadə yeməklər isə orta hesabla 20 dollar civarındadır.

Paşa Məmmədli