Niyə startaplara yox, kiçik bizneslərə yatırım etdi?

Kodi Sançez (Codie Sanchez) uzun illər maliyyə və investisiya sektorunda çalışıb. O, jurnalistika sahəsində fəaliyyətə başladıqdan sonra maliyyə dünyasına keçib və sonradan iri investisiya şirkətlərində işləyib.

Valyuta.az xəbər verir ki, karyerası ərzində “Goldman Sachs”, “State Street” və digər maliyyə qurumlarında müxtəlif vəzifələrdə çalışıb.

Maliyyə sektorunda yüksək maaşlı və prestijli işə sahib olsa da, Kodi Sançez sonradan bu həyatın onu tam qane etmədiyini açıqlayıb. O, müsahibələrində tez-tez qeyd edir ki, böyük korporativ sistemdə işləmək əvəzinə daha sərbəst və real biznes modelləri qurmaq istəyirdi.

Bu səbəbdən o, klassik startaplara yox, insanların çox diqqət etmədiyi kiçik bizneslərə yönəldi. Kodi Sançez xüsusilə avtomatlaşdırılmış və gündəlik idarəçiliyi daha stabil olan biznes modellərinə maraq göstərməyə başladı. O, avtoyuma məntəqələri, anbar xidmətləri, xidmət şirkətləri və digər kiçik bizneslərə investisiya etməklə fərqli model qurdu.

Sonradan o, bu yanaşmanı sosial mediada və podkastlarda paylaşmağa başladı. Kodi Sançez “kiçik biznes almaq” modelini geniş auditoriyaya izah edən sahibkarlardan birinə çevrildi. Xarici mediada onun fəaliyyəti tez-tez “ənənəvi startap modelindən fərqli biznes yanaşması” kimi təqdim olunur.

O, xüsusilə insanların böyük texnologiya startaplarına fokuslandığını, amma stabil gəlir gətirən kiçik bizneslərin çox zaman diqqətdən kənarda qaldığını vurğulayır.

Bu gün Kodi Sançez media, investisiya və sahibkarlıq sahəsində fəaliyyət göstərir. O, “Contrarian Thinking” platforması vasitəsilə biznes və investisiya mövzusunda kontent istehsal edir.

Bəzən ən böyük imkanlar hamının baxdığı yerdə yox, insanların diqqət etmədiyi sahələrdə olur.

Mayya Hüseynova