Dünya neft qıtlığı astanasındadır: Ehtiyatlar rekord sürətlə azalır

“Goldman Sachs” investisiya bankının analitikləri bildiriblər ki, Yaxın Şərqdə davam edən müharibə səbəbindən dünya üzrə neft və neft məhsulları ehtiyatları rekord sürətlə azalır. Müharibə bazara tədarükü məhdudlaşdırır. 

Valyuta.az xəbər verir ki, bu barədə “Bloomberg” məlumat yayıb.

Analitiklərin məlumatına görə, may ayında “qara qızıl” və neft məhsulları ehtiyatları gündəlik rekord həcmdə — 8,7 milyon barel azalıb. Bu göstərici İrandakı müharibənin başlanmasından bəri orta azalma tempindən təxminən iki dəfə yüksəkdir. Eyni zamanda mütəxəssislər hazırda Hörmüz boğazında gəmiçiliyin tam bərpasını gözləmirlər.

“Boğaz vasitəsilə proqnozlaşdırılan neft ixracı normanın cəmi 5%-i səviyyəsində qalır”, deyə ekspertlər bildiriblər.

Onların sözlərinə görə, may ayında alıcılar əsasən tankerlərdə saxlanılan neft və neft məhsulları ehtiyatlarını istifadə ediblər. Bununla yanaşı, neft və neft məhsullarının ixracı idxaldan daha sürətlə azalır ki, bu da qıtlıq riskini artırır. Ekspertlər əlavə ediblər ki, Avropaya aviasiya yanacağı tədarükü 2025-ci ilin orta göstəricilərindən 60% aşağı olub.

Bununla belə, “Goldman Sachs” qeyd edir ki, mart ayından bəri dünya üzrə neft və neft məhsulları ehtiyatları gündəlik orta hesabla 4,6 milyon barel azalsa da, illik müqayisədə onlar əvvəlki səviyyədə qalıb. Analitiklər bunu Yaxın Şərqdə müharibədən əvvəlki doqquz ay ərzində formalaşmış “əhəmiyyətli ehtiyat”la izah edirlər.

Trendin nümunəsi kimi onlar Çini göstərirlər. Dünyanın ən böyük neft idxalçısı olan Çində neft emalı zavodları neftə qarşı “maraqsızlıq” nümayiş etdiriblər ki, bu da idxalın “əhəmiyyətli dərəcədə azalmasına” səbəb olub. Bank iqtisadçılarının qiymətləndirmələrinə əsaslanan analitiklər əlavə edirlər ki, Çində yanacaq satışları aprel ayında qismən zəif iqtisadi fəallıq səbəbindən 22% azalıb.

Bu arada ABŞ-də rəsmi məlumatlara görə, ötən həftə ölkə üzrə neft ehtiyatları, o cümlədən Strateji Neft Ehtiyatı rekord həcmdə — 17,8 milyon barel azalıb. Səbəb kimi rekord ixrac həcmlərinin ehtiyatları sürətlə tükətməsi göstərilir. Oklahoma ştatındakı Kuşinq neft terminalında ehtiyatlar isə tədricən “rezervuarların minimum həddi”nə yaxınlaşır.

Paşa Məmmədli