"SpaceX" IPO-suna "Goldman Sachs" rəhbərlik edəcək

İlon Maskın "SpaceX" şirkəti birjaya çıxış üçün vacib mərhələ sayılan S-1 sənədini yayımlayıb. Şirkətin IPO prosesinə rəhbərlik edən əsas bank isə "Goldman Sachs" olub.

Valyuta.az xəbər verir ki, sənəddə şirkətin bazar dəyəri rəsmi olaraq açıqlanmasa da, əvvəlki qiymətləndirmələrdə "SpaceX"in dəyərinin 2 trilyon dollara çatdığı bildirilirdi. Bu isə onu dünyanın ən bahalı şirkətlərindən birinə çevirir.

"SpaceX" 2025-ci ildə 18,7 milyard dollar gəlir əldə etsə də, 4,9 milyard dollar zərər edib.

IPO prosesində əsas iştirakçılar sırasında "Morgan Stanley", "Bank of America", "Citigroup" və "JPMorgan Chase" də yer alır. Ümumilikdə isə layihədə 23 maliyyə qurumu iştirak edir.

Şirkətin səhmləri "SPCX" tickeri ilə həm "Nasdaq", həm də Texasdakı "Nasdaq Texas" platformasında listinq olunacaq.

Ekspertlərin fikrincə, bu IPO ABŞ bankları üçün rekord gəlir mənbəyinə çevrilə bilər. Məlumata görə, 75 milyard dollarlıq səhm təklifi zamanı bank komissiyaları 1 milyard dollardan çox ola bilər.

Florida Universitetinin professoru Cey Ritter bildirib ki, bu miqyasda IPO bazar üçün “misilsiz hadisə” hesab olunur.

Qeyd edək ki, IPO bazarında son aylarda aktivlik əhəmiyyətli dərəcədə artıb və böyük banklar kapital bazarlarında gəlirlərinin yüksəldiyini açıqlayıblar.

Tənzilə Ağabalayeva