“Təcrübəli kadrları tamamilə yenilərlə əvəzləmək böyük riskdir”

​Süni intellekt və yeni rəqəmsal texnologiyalar əmək bazarına o qədər sürətlə daxil olur ki, bir çox şirkətlər və əməkdaşlar ciddi bir adaptasiya prosesi ilə qarşı-qarşıyadırlar. Xüsusilə yeni nəslin texnoloji yenilikləri köhnə nəslə nisbətən daha çevik mənimsəməsi, bu gün korporativ dünyada böyük bir dilemmanın əsasını qoyub. Şirkətlər artıq mühüm seçim qarşısındadırlar: İllərin təcrübəsinə sahib olan köhnə kadrları işdən çıxarıb, yerinə texnologiyanı mükəmməl bilən gənclərimi gətirməli, yoxsa mövcud təcrübəli komandaya sərmayə yatırıb onlara rəqəmsal bacarıqları öyrətməlidirlər?

​Azərbaycan HR İnstitutunun təsisçisi və direktoru Emil Hüseynov Valyuta.az-a bildirib ki, şirkətlərin bu məsələyə ciddi maraq göstərməsi artıq sadə bir seçim deyil, birbaşa strateji zərurətdir:

“Süni intellekt və rəqəmsal texnologiyalar iş modellərini fundamental şəkildə dəyişir. Bu dəyişikliklərə zamanında uyğunlaşa bilməyən və kadr islahatlarını düzgün aparmayan şirkətlər rəqabət mühitində sıradan çıxmağa məhkumdurlar”.

​Onun sözlərinə görə, məsələyə yalnız “texnologiyanı öyrənən qalacaq, öyrənməyən gedəcək” kimi amansız bazar qanunları ilə baxmaq doğru deyil, çünki burada qarşılıqlı məsuliyyət var:

“Şirkətlər insan kapitalına mütləq investisiya etməli, əməkdaşların yeni bacarıqlar qazanması üçün təlim və inkişaf imkanları yaratmalıdırlar. Unutmaq olmaz ki, texnologiyanın uğurlu tətbiqi yalnız proqram təminatı almaqla bitmir, həmin alətləri şirkətin xeyrinə düzgün idarə edə bilən insan faktoruna ehtiyac var. Eyni zamanda, əməkdaşların özləri də davamlı öyrənməyə açıq olmalıdır. Müasir əmək bazarında əsas üstünlük artıq yalnız sabit təcrübə deyil, dəyişikliklərə çevik uyğunlaşmaq qabiliyyətidir”.

​Ekspert vurğulayır ki, təcrübəli kadrlar şirkətlər üçün hələ də əvəzedilməz bir dəyər daşıyır və onları tamamilə yeniləri ilə əvəzləmək böyük riskdir:

“Bəli, texnologiya əməliyyatları sürətləndirir, hesabatları saniyələr içində hazırlayır, lakin strateji düşüncə, kritik qərarvermə, komanda idarəçiliyi və sahə üzrə dərin praktiki biliklər yalnız illərlə formalaşan təcrübə sayəsində qazanılır. Bu səbəbdən, ağıllı şirkətlərin əsas hədəfi təcrübəli əməkdaşları tamamilə kənarlaşdırmaq yox, onları yeni texnologiyalarla işləməyə adaptasiya etməkdir. Bu gün qlobal bazarda ən uğurlu model təcrübə + texnologiya sintezidir”.

​Ekspert əlavə edib ki, dəyişikliklərə tam qapalı olan və innovasiyaları mənimsəməyə maraq göstərməyən əməkdaşların gələcəyi hər bir halda risk altındadır:

“Müasir biznes dünyası yalnız keçmiş uğurlara və staja deyil, çeviklik və öyrənmə potensialına böyük önəm verir. Gələcəyin əmək bazarında ən çox tələb olunan və ən yüksək dəyər görəb profil həm peşəkar sahə təcrübəsinə, həm də güclü rəqəmsal bacarıqlara eyni dərəcədə sahib olan şəxslər olacaq”.

Rəfiqə Abdin