Texnologiyadan uzaq iş axtaranlar hələ də küçə elanlarına üstünlük verir

Rəqəmsal platformaların, peşəkar iş şəbəkələrinin və onlayn vakansiya resurslarının sürətlə inkişaf etdiyi bir dövrdə hələ də küçələrdə, dayanacaqlarda və ictimai məkanlarda “iş axtarıram” məzmunlu elanlara rast gəlinir. Bəzi insanlar sadəcə əlaqə nömrəsini qeyd edərək bu üsulla iş tapmağa çalışırlar. İlk baxışda köhnəlmiş görünən bu metodun niyə hələ də istifadə olunması isə maraq doğurur. Maraqlıdır, ənənəvi və sadə görünən bu metod müasir əmək bazarında nə dərəcədə effektivdir?

İnsan resursları üzrə menecer, əmək və sosial münasibətlər üzrə ekspert Leyla Əsədullayeva Valyuta.az-a bildirib ki, bu üsulun hələ də mövcud olmasının bir neçə səbəbi var: "Bəzi namizədlərin texniki imkanları məhdud olur, köhnə telefon istifadə edirlər, internetə çıxışları zəif olur və ya elektron poçtdan aktiv istifadə etmirlər. Belə namizədlər bəzən vakansiya saytlarından xəbərsiz olur, elanları vaxtında görmür və rəqəmsal platformalarda aktiv iştirak edə bilmirlər. Nəticədə daha sadə və əlçatan üsullara üz tuturlar".

L.Əsədullayevanın sözlərinə görə, bu yanaşma daha çox yaşı nisbətən yüksək olan şəxslər və şəhərdən kənar ərazilərdə yaşayan namizədlər arasında müşahidə olunur: "Bu qrupların bir hissəsi texnologiya ilə daha az təmasda olur və ənənəvi üsulları daha rahat hesab edir".

Ekspert vurğulayır ki, bəzi hallarda işəgötürənlər də məhz həmin auditoriyanı hədəflədiyi üçün fərqli üsullardan istifadə edir: "Hər vakansiya üçün yalnız e-mail, LinkedIn və ya vakansiya portalları effektiv olmur. Bəzən namizədi yerində, birbaşa və alternativ kanallarla tapmaq daha real nəticə verir".

O bildirib ki, küçə elanlarının auditoriyası adətən lokal xarakter daşıyır: "Məsələn, müəyyən ərazidə yaşayan müəllim, dayə və ya xidmət göstərən şəxs yaxınlıqda yaşayan insanlara müraciət edir. Bu zaman məqsəd uzağa getmədən işləmək və ya evdən xidmət göstərmək olur".

Bununla belə, ekspert hesab edir ki, bu metodun effektivliyi yüksək deyil: "Çünki belə elanlar geniş auditoriyaya çatmır və imkanları məhdud olur. Bundan əlavə, bütün sektorlar bu üsulla namizəd axtarışını uyğun hesab etmir. Bu cür elanlar daha çox kiçik və orta səviyyəli işlər üçün uyğun sayılır. Yüksək vəzifələr və peşəkar karyera imkanları üçün isə müasir rəqəmsal platformalar daha effektiv vasitə olaraq qalır".

Onun fikrincə, bu üsul köhnəlmiş sayılsa da, müəyyən sosial qruplar və lokal ehtiyaclar üçün hələ də istifadə olunmağa davam edir.

Sərvanə Rəmixanova