“Unibank”, yoxsa “Expressbank”: hansı bankın kartları daha sərfəlidir?

Vətəndaşlar arasında bank kartı seçimi zamanı əsas diqqət yetirilən məqamlar kart qalığına hesablanan illik gəlir, keşbek imkanları, xidmət haqqı və ümumi şərtlərdir. Xüsusilə son dövrdə müştərilər hansı bankın daha yüksək əmanət faiz təklif etdiyi, daha çox keşbek qazandırdığı və xidmət xərclərinin daha sərfəli olduğu ilə maraqlanırlar.

Bu baxımdan Valyuta.az “Unibank” və “Expressbank”ın təqdim etdiyi fərdi müştərilər üçün təqdim olunan maliyyə məhsulları arasında müqayisə aparıb.

Kart qalığına hesablanan illik gəlir

Hər iki bank debet və bəzi premium kartlar üzrə kart qalığına illik gəlir tətbiq edir.

“Expressbank”ın "Expresso Standard" və "Expresso Platinum" debet kartlarında qalığa illik 6% gəlir hesablanır. "Visa Infinite" (debet və kredit) və "Mastercard Black Edition" (debet və kredit) kartlarında isə bu göstərici 7% təşkil edir.

“Unibank”da isə "UCard", "Visa Platinum" və "Visa Infinite" kartları üzrə qalığa illik 7%-dək gəlir tətbiq olunur.

Kartların xidmət haqqı

“Expressbank”ın "Expresso Standard" debet kartının xidmət haqqı 10 manatdır və kartın müddəti 4 ildir. "Expresso Platinum" debet kartı 50 manatdır (müddət 4 il). "Visa Infinite" kartı üçün "Only Package" 300 manat, "Family Package" isə 400 manat təşkil edir və kartın müddəti 3 ildir. "Mastercard Black Edition" kartı üzrə xidmət haqqı 12 aylıq 100 manat, 24 aylıq 150 manat, 36 aylıq isə 200 manatdır.

"Expresso Standard" kredit kartı 10 manat, "Expresso Platinum" kredit kartı isə 50 manatdır və hər iki kartın müddəti 4 ildir.

“Unibank”da "Digital Card" və "UCard" pulsuz təqdim olunur və kartın müddəti 5 ildir. "Unimiles" kartının xidmət haqqı 100 manatdır və kart 3 il müddətinə verilir.

Keşbek şərtləri

“Unibank” üzrə keşbek yalnız müəyyən edilmiş tərəfdaş və kateqoriyalar çərçivəsində hesablanır. SOCAR üzrə maksimal 10 manat, Trendyol, Temu, Bravo, Push30 və restoranlar üzrə hər istiqamət üçün 20 manat, Baku Medical Plaza üzrə 50 manat, digər kateqoriyalar üzrə isə 20 manat limit tətbiq olunur. Hər istiqamət üzrə müəyyən edilmiş maksimal məbləğə çatdıqda müştəriyə bildiriş göndərilir və həmin kateqoriya üzrə əlavə keşbek hesablanmır.

“Expressbank”da "Expresso Standard" və "Expresso Platinum" (debet və kredit), həmçinin "Visa Infinite" və "Mastercard Black Edition" (debet və kredit) kartları üzrə partnyor şəbəkələrdə edilən alış-verişlərə 30%-dək keşbek tətbiq olunur. Keşbek faizi və maksimal məbləğ tərəfdaş müəssisə və kampaniya şərtlərindən asılı olaraq dəyişə bilər.

"Unibank" fərdi müştərilər üçün Müddətli, Yığım, Proqressiv və Topla əmanət məhsullarını təqdim edir.

Bankın təklif etdiyi şərtlər cədvəldəki kimidir: 

"Expressbank"ın təklifləri sırasına Extra Rəqəmsal Depozit, Klassik Əmanət, Mücrü Əmanət və Əlavə Fürsət əmanət məhsulları daxildir.

Hər iki bank fərdi müştərilər üçün həm nağd, həm də ipoteka kreditləri təklif edir.

Nağd kreditlər

"Unibank"da nağd kredit üzrə maksimal məbləğ 70 000 manatdır. Kredit müddəti minimum 3 ay, maksimum 60 ay təşkil edir. İllik faiz dərəcəsi 9%-dən 31,45%-dək, faktiki illik faiz dərəcəsi (FİFD) isə göstərilən aralıqda tətbiq olunur. Kredit proseduruna görə komissiya 1%, 3% və ya 5% (minimum 20 manat) təşkil edir. Yeni müştərilər üçün şərtlər eyni olmaqla, komissiya 0% müəyyən edilib və minimal kredit məbləği 300 manatdır.

"Expressbank"ın nağd pul krediti üzrə maksimal məbləği də 70 000 manatadəkdir. Minimal illik faiz dərəcəsi 9,9%, FİFD isə minimum 11,9%, maksimum 36,6% təşkil edir. Kredit üzrə əsas məbləğin ödənişinə 2 ay güzəşt tətbiq olunur. Təminatsız kreditlər üzrə illik faiz 9,9%-dən başlayır, məbləğ 300-40 000 manat, müddət isə 59 ayadəkdir, komissiya 0%-3% aralığında dəyişir. Ev təminatlı kreditlərdə illik faiz 9,9%-dən, məbləğ 10 000-70 000 manat, müddət 59 ayadək, komissiya isə 1% təşkil edir.

İpoteka kreditləri

"Unibank"ın ipoteka krediti üzrə maksimal məbləğ 150 000 manatdır, müddət 3 ildən 25 ilədək (300 ayadək) müəyyən edilir. Güzəştli ipoteka üzrə maksimal məbləğ 100 000 manat, müddət isə 30 ilədəkdir. İllik faiz dərəcəsi 8%-dən artıq ola bilməz, güzəştli ipotekada isə bu göstərici 4%-dən artıq deyil. Kredit məbləği 150 000 manatdan və girov qoyulan yaşayış sahəsinin bazar dəyərinin 70%-indən artıq ola bilməz. İlkin ödəniş minimum 30% təşkil edir.

"Expressbank"ın Standart İpoteka krediti üzrə maksimal məbləğ 150 000 manat, minimal illik faiz dərəcəsi 8%, müddət 25 il, ilkin ödəniş isə minimum 20% müəyyən edilib. Güzəştli ipoteka krediti üzrə maksimal məbləğ 100 000 manat, müddət 30 il, illik faiz dərəcəsi 4%, ilkin ödəniş isə 30% təşkil edir.