"Yelo Bank"ın sanksiya altına düşməsinə Mərkəzi Bankdan reaksiya 

Azərbaycan Mərkəzi Bankının sədri Taleh Kazımov Avropa İttifaqının "Yelo Bank"a tətbiq etdiyi sanksiyalara münasibət bildirib.

Valyuta.az "Milli.az"a istinadən xəbər verir ki, Mərkəzi Bankın sədri mətbuat konfransında jurnalistlətin suallarını cavablandırarkən bildirib ki, Mərkəzi Bank məsələ ilə bağlı bankla daim əlaqə saxlayır və hazırda ciddi risklər müşahidə olunmur:

"Bank kifayət qədər dayanıqlıdır. Həm likvidlik, həm də kapital adekvatlığı baxımından hər hansı mənfi gözləntimiz yoxdur".

T.Kazımov qeyd edib ki, sanksiyalar müəyyən ödənişlərdə çətinlik yarada bilsə də, son həftələrdə aparılan müzakirələr zamanı ciddi problem qeydə alınmayıb.

Əlavə edib ki, qərarın səbəbləri ilə bağlı araşdırmalar aparılır və məsələ hüquqi müstəviyə çıxarılacaq:

"Ümid edirik ki, növbəti aylarda Avropa İttifaqı bu qərarını dəyişdirəcək. Çünki hər hansı əsaslı səbəb görmürük".

O, həmçinin bildirib ki, bankın Rusiya Federasiyasının SPFS sisteminə qoşulması ilə bağlı iddialar köhnə dövrə aiddir:

"Bu qoşulma münaqişədən əvvəl olub və sistem istifadə edilmədən bağlanıb. Ola bilsin ki, burada anlaşılmazlıq var".

Qeyd edək ki, bir neçə gün öncə Avropa İttifaqı Rusiyaya qarşı 20-ci sanksiyalar paketini tətbiq edib. Siyahıya "Yelo Bank"ın da adı daxil edilib.