Asiyada bu yay çimərlik istirahəti üçün ən yaxşı yerlər - TOP-5

Yaxın Şərqdə İran müharibəsi səbəbilə təhlükəsizlik böhranı fonunda qərbli turistlər alternativ istirahət yerləri axtararaq getdikcə daha çox Asiya ölkələrinə yönəlirlər.

Valyuta.az xəbər verir ki, "PRNewswire"nin yazdığına görə, rəqəmsal turizm platforması “Agoda” 2026-cı ilin yayının əvvəlində Asiyada xüsusilə populyarlaşan 5 sahil istiqamətini müəyyən edib. May ayı üzrə daxili yerləşmə axtarışlarına əsasən bu istiqamətlər ötən illə müqayisədə ciddi artım göstərib.

Mütəxəssislər qeyd edirlər ki, bu sahil istiqamətlərinin əsas üstünlüyü kiçik ərazidə müxtəlif təcrübələr təqdim etməsidir. Çimərliklərdən əlavə turistləri qastronomiya, yerli bazarlar, mədəni abidələr və yaxın təbiət əraziləri cəlb edir.

Da Nanq, Vyetnam

Daxili axtarışlara görə Da Nanq maraq ötən illə müqayisədə 72% artıb. Burada Mi Khe çimərliyinin uzun sahili ilə yanaşı Mərmər dağları və qədim Hoi An şəhərinə yaxınlıq turistlər üçün əsas cəlbedici amillərdir. Şəhərdə inkişaf edən kafe və dəniz məhsulları restoranları da istirahət üçün əlavə üstünlük yaradır.

Nha Tranq, Vyetnam

Geniş körfəzi və adalarla zəngin sahili ilə tanınan Nha Tranq klassik dəniz istirahəti axtaran turistləri cəlb etməyə davam edir. Bu il maraq 36% artıb. Turistlər əsas çimərlik istirahətini yaxın adalara qayıq turları və Po Naqar Çam qüllələri kimi mədəni yerlərlə birləşdirirlər.

Bali, İndoneziya

Artıq məşhur olan bu adaya maraq 13% artıb. Çanqqu sörfçüləri və kafe mədəniyyəti ilə seçilir, Uluvatu isə sahil mənzərələri və məbədləri ilə diqqət çəkir. Ubud isə düyü terrasları, sağlamlıq mərkəzləri və incəsənət fəaliyyəti ilə fərqli atmosfer yaradır.

Qoa, Hindistan

Hindistanın qərbində yerləşən bu keçmiş Portuqaliya koloniyası uzun illərdir məşhur çimərlik istiqamətidir və son ildə maraq 13% artıb. Şimal və cənub sahilləri arasında fərqlər, Avropa memarlığı, dəniz mətbəxi və rəngarəng bazarlar bölgəni cazibədar edir.

Pattaya, Tailand

Banqkoka yaxınlığı ilə seçilən bu sahil şəhərinə maraq 11% artıb. Əsas çimərlik bölgəsi daha canlı olsa da, yaxınlıqdakı Koh Larn adası daha təmiz su və sakit mühit təklif edir. Şəhər həm də restoranlar və qısa müddətli istirahət imkanları ilə tanınır.

"Agoda" şirkətinin baş vitse-prezidenti Endryu Smit bildirib ki, sahil istiqamətləri sadəlik və çeviklik təklif etdiyinə görə turistlər arasında populyarlığını qoruyur.

Paşa Məmmədli