“AzerGold”un törəmə müəssisələrinin zərəri kəskin artıb - Cəmi 1 rəqəm açıqlanır 

“AzerGold”un törəmə müəssisələrinin zərəri kəskin artıb. 

Valyuta.az xəbər verir ki, “AzerGold” QSC ötən ili müsbət nəticələrlə başa vursa da, törəmə müəssisələri haqqında eyni şeyi demək mümkün deyil. 

Belə ki, maliyyə göstəricilərinə əsasən, “AzerBlast” MMC-nin xalis zərəri ötən il 3 dəfəyə yaxın artıb. Nəticədə 2023-cü ildə 53 min ABŞ dollarından 2024-cü il üçün 1,43 milyon dollara yüksəlib. Digər törəmə şirkət – “Daşkəsən Dəmir Filiz” MMC  mənfəətdən zərərə keçib. Belə ki, MMC 2023-cü ildə 80 min dollar xalis mənfəət əldə etsə də, 2024-cü ili 0,52 milyon dollar xalis zərərlə bitirib. İki təşkilatın ümumi zərəri ötən il 2 milyon dollara yaxın olub. 

Ümumilikdə “Azergold”un konsolidə olunmuş xalis mənfəəti 2023-cü ildəki 27,23 milyon dollardan ötən il 33,02 milyon dollara yüksəlib. 

Maraqlıdır ki, “Azergold” törəmə müəssisələrinin ayrıca audit hesabatları açıqlamır. Yalnız konsolidə olunmuş hesabatda ümumi olaraq şirkətlərlə bağlı bir göstəricini açıqlamaqla kifayətlənir. Halbuki, şəffaflıq və ictimai nəzarət baxımından, xüsusən də zərər açıqlayan törəmə müəssisələrin ayrıca audit hesabatları da açıqlanmalı və ictimaiyyətə təqdim olunmalıdır. Bu, dövlət müəssisələrində səmərəliliyin qiymətləndirilməsi və maliyyə risklərinin aşkarlanması üçün vacibdir.