Süni intellekt ilə biznes qurmağın yolu - Əziz Ağayev açıqlayır...

ABŞ-da süni intellekt sahəsində fəaliyyət göstərən “Flowlyst” şirkətinin təsisçisi Əziz Ağayev Bakıda keçirilən seminarda iştirakçılara süni intellekt alətlərinin biznesdə tətbiqi və yeni texnologiyaların yaratdığı imkanlardan danışıb.

O, xüsusilə “Google”un süni intellekt əsaslı Notebook LM alətini nümunə göstərərək bildirib ki, bu platforma tələbələr üçün nəzərdə tutulsa da, bizneslər üçün də böyük potensiala malikdir.

Seminarda Ə.Ağayev son dövrlərdə populyarlıq qazanan Cloud Code alətindən də bəhs edib. O, iştirakçılara bu texnologiyanı öyrənməyi tövsiyə edərək, süni intellektin köməyi ilə proqram və xidmətlər hazırlamağın artıq əvvəlki qədər çətin olmadığını vurğulayıb.

Onun sözlərinə görə, uğurlu məhsul yaratmaq üçün ilk addım bazardakı problemləri müəyyənləşdirməkdir:

“Əvvəlcə süni intellekt vasitəsilə insanların ən çox hansı problemlərdən danışdığını araşdırın. Daha sonra yenə süni intellekt ilə həmin problemlərin həlli yollarını düşünün, məhsulu hazırlayın və satışa çıxarın”.

Əziz Ağayev yeni başlayan sahibkarlara yaxın çevrələrindəki insanların problemlərini araşdırmağı da məsləhət görüb. O bildirib ki, ilk müştərilər çox vaxt dostlar, qohumlar və tanışlar olur: “Problemləri həll edin və məhsulunuzu satın. Pulsuz təqdim etdiyiniz məhsulun dəyəri çox zaman görünmür”.

Tədbirdə startapların ilkin maliyyələşməsi məsələsinə də toxunan Ə.Ağayev bildirib ki, biznesin ilk mərhələlərində ailə və yaxınların dəstəyi mühüm rol oynayır. Onun fikrincə, bir çox uğurlu layihələr məhz kiçik məbləğli ilkin investisiyalarla fəaliyyətə başlayır.

Ekspert hesab edir ki, süni intellekt alətlərinin sürətlə inkişaf etdiyi indiki dövrdə ən böyük imkan texnologiyanın özündə deyil, onun vasitəsilə real problemlərə həll təqdim etməkdədir.

Mələk Ziyad