"Uber" tətbiqinə otel rezervasiyası əlavə olunur

"Uber" tətbiqinə yeni xidmət inteqrasiya edilib.

Valyuta.az xəbər verir ki, şirkət "Expedia Group" ilə əməkdaşlıq çərçivəsində tətbiqinə otel rezervasiyası imkanını inteqrasiya edib. Bu yenilik sayəsində istifadəçilər dünya üzrə 700 mindən çox otelə çıxış əldə edəcəklər.

Məlumata görə, "Uber One" abunəçiləri tətbiq üzərindən rezervasiya etdikdə 10 minə yaxın oteli əhatə edən siyahıda 20%-ə qədər endirim əldə edə biləcəklər. Bundan əlavə, bütün rezervasiyalar üzrə istifadəçilərə 10% həcmində "Uber" krediti geri qaytarılacaq.

Qeyd edək ki, "Uber" CEO-su Dara Xosrovşahi bildirib ki, şirkət artıq yalnız nəqliyyat və ya yemək sifarişi xidməti göstərən platforma deyil, istifadəçilərə səyahət planlaşdırmaq imkanı verən “hər şey üçün tətbiq”ə çevrilir.

Şirkət həmçinin tətbiqinə yeni “Səyahət rejimi” funksiyasını da əlavə edib. Bu rejim istifadəçilərə turist məkanları, yerli tövsiyələr və digər faydalı məlumatları təqdim edən bələdçi rolunu oynayır.

Sərvanə Rəmixanova