"Özünü “çoxişləyən” kimi göstərən əməkdaşlar digərlərini kölgədə qoya bilər" - Ekspert

İş mühitində bəzən eyni səviyyədə çalışan insanlar arasında fərqlənmə gözlənildiyi kimi olmur. Görülən işin həcmi və keyfiyyəti ilə yanaşı, onun necə qəbul edildiyi və nə dərəcədə görünür olduğu da rol oynayır. Bu isə iş həyatında diqqət və dəyərləndirmənin hər zaman obyektiv olmadığını göstərir və belə bir düşüncəni ortaya çıxarır: həqiqətən, səssiz işləyənlər işdə az fərq edilir?

İnsan Resursları mütəxəssisi Pərvanə Həsənova Valyuta.az-a bildirib ki, müəssisənin əsas kapitalı insanlardır, əməkdaşlardır. Müxtəlif psixologiyalara, davranışlara, dünyagörüşlərinə malik olan insanlar eyni korporativ mühitdə çalışarkən çox müxtəlif hallarla rastlaşırlar və bu münasibətlərdən korporativ mühit formalaşır. Hər insanın xarakteri fərqli olduğu kimi, işə yanaşması da fərqli ola bilir:

“İşləyən şəxslərin şəxsi keyfiyyətləri işə münasibətlərinə ciddi təsir edir. Bəzən hər xırda işini qabardıb özünü “çox işləyən” kimi göstərən əməkdaşlar digərlərinin işlərini kölgə altına ala bilirlər. Təəssüf ki, istər iri, istərsə də xırda bizneslərdə belə hallara tez-tez rast gəlinə bilir. İşlərin çoxluğu və ya kifayət qədər diqqətin olmaması səbəbindən rəhbərlər bu nüansları gözdən qaçıra bilirlər. Belə hallar isə nisbətən toksik münasibətlərə, bərabərsizliyə, ədalətsizliyə, işləyən əməkdaşların küskünləşməsinə gətirib çıxara bilir. Bunun üçün bütün əməkdaşlar icra etdikləri işləri düzgün şəkildə təqdim etmək bacarığına malik olmalıdır. İş mühitində balansı qorumaq olduqca vacibdir”.

“Lakin elə müəssisələr də var ki, bunları nəzarətdə saxlaya bilirlər. Bunun üçün işçinin icra etdiyi işin xarakteri, görülən işin mahiyyəti, biznesə təsiri, sistemlilik, tapşırıqların sayı, həmçinin ağırlıq dərəcəsi, icra müddəti, KPI sistemi, performans dəyərləndirməsinin düzgün aparılması çox böyük rol oynayır. Bəzən elə sakit xarakterli, işini “reklam” etməyən işçi olur ki, 2-3 nəfərin icra edəcəyi işi təkbaşına həll edir. Həmin dəyərli əməkdaşlar rəhbərlərin xüsusi diqqət mərkəzində olur və müəssisə rəhbərliyi həmin işçiləri itirmək istəmir, lazımi güzəştlərə gedə bilir. Bu kimi və digər halları nəzarətdə saxlamaq və ədalətlilik prinsipini qorumaq üçün HR sistemləri yaxşı düşünülmüş və məntiqli olmalıdır. Motivasiya və əməkhaqqı sisteminə ciddi əməl edilməlidir. İşçiləri motivasiyadan salan, loyallığını azaldan, küsdürən davranışlardan uzaq durmaqla nisbi bərabərliyi təmin etmək olar”, – deyə HR mütəxəssisi qeyd edib.

Tənzilə Ağabalayeva