Universitet tələbələri adi diş çöpündən uğurlu biznes qurdu

Universitet yataqxanasında yaranan sadə bir ideya qısa müddətdə milyonlarla avroluq biznesə çevrilib.

Valyuta.az xəbər verir ki, Almaniyada bir qrup tələbə adi diş çöpünü fərqli məhsula çevirərək bazarda böyük uğur qazanıb.

Söhbət aromalı diş çöpləri istehsal edən "Pick'em" startapından gedir. Layihənin müəllifləri olan tələbələr məhsulun içinə müxtəlif dad və aromalar hopduraraq onu həm nəfəsi təravətləndirən, həm də saqqıza alternativ kimi istifadə oluna bilən məhsula çeviriblər.

İdeyanın müəllifləri Niklas Terrahe, Max Schröpfer, Joel Enayat və onların dostlarıdır. Onlar universitetdə təhsil aldıqları dövrdə tələbə evində müxtəlif eksperimentlər apararaq ilk məhsullarını hazırlayıblar. Layihəyə başlanğıc mərhələdə cəmi bir neçə min avro sərmayə qoyulub.

İlk istehsal partiyası təxminən 2 min qutudan ibarət olub. Məhsullar 20 kvadratmetrlik kiçik otaqda saxlanılır, sifarişlərin hazırlanması və göndərilməsi isə tələbələrin özləri tərəfindən həyata keçirilirdi.

Şirkətin yüksəlişində dönüş nöqtəsi TikTok olub. Sosial şəbəkədə yayılan videolardan biri qısa müddətdə viral xarakter alıb və sifarişlər kəskin şəkildə artıb. Tələbələr uzun müddət tələbatı qarşılaya bilməyib, məhsullar isə demək olar ki, daim tükənmiş vəziyyətdə olub.

Məlumatlara görə, "Pick'em" bu günə qədər 250 milyondan çox aromalı diş çöpü satıb. Şirkətin satış gəlirləri 4 milyon avronu keçib, bəzi mənbələr isə illik dövriyyənin artıq 10 milyon avro səviyyəsinə yaxınlaşdığını bildirir. 

Hazırda şirkətin məhsulları Avropanın müxtəlif ölkələrində satılır. Startapın uğuru Almaniyanın məşhur investisiya proqramlarından biri olan "Die Höhle der Löwen"də iştirak etdikdən sonra daha da sürətlənib. Layihə çərçivəsində investorlar şirkətə 250 min avro sərmayə yatıraraq pay əldə ediblər.

Şirkət artıq kiçik tələbə otağından 800 kvadratmetrlik istehsal sahəsinə keçib. Brendin yüz minlərlə müştərisi olduğu bildirilir və məhsullar bir sıra iri pərakəndə satış şəbəkələrində yer almağa başlayıb.

Mütəxəssislərin fikrincə, layihənin uğurunun əsas səbəbi məhsulun özündən çox onun təqdimat üsulu olub. Tələbələr adi diş çöpünü sadəcə gigiyena vasitəsi kimi deyil, həyat tərzi məhsulu kimi bazara çıxarıblar. Bu yanaşma gənclərin diqqətini çəkib və məhsulun qısa müddətdə geniş auditoriyaya çatmasına imkan verib.

"Pick'em"in hekayəsi göstərir ki, bəzən milyonluq biznes qurmaq üçün mürəkkəb texnologiyaya ehtiyac olmur. Gündəlik istifadə olunan ən sadə məhsulun belə fərqli təqdimatı qlobal uğura çevrilə bilər.

Mayya Hüseynova