Bank sektorunda illərlə çalışan xanım öz rəqəmsal bankını yaratdı - SƏHƏR OXUSU

Bu gün Avropanın ən tanınan rəqəmsal banklarından biri sayılan “Starling Bank”ın arxasında uzun illər ənənəvi bank sektorunda çalışan Anne Boden dayanır.

Valyuta.az xəbər verir ki, o, onilliklərlə böyük maliyyə qurumlarında rəhbər vəzifələrdə işlədikdən sonra mövcud sistemi tərk edib öz bankını qurmağa qərar verdi. 

Universitetdə kimya və kompüter elmləri üzrə təhsil alıb. Daha sonra bank sektoruna daxil oldu və “Lloyds Bank”, “Standard Chartered”, “UBS”, “Royal Bank of Scotland” və “Allied Irish Banks” kimi iri maliyyə qurumlarında çalışıb. Karyerası boyunca texnologiya, əməliyyat idarəçiliyi və rəhbərlik sahələrində yüksək vəzifələr tutdu.

Uzun illər bank sektorunda işlədikdən sonra Anne Boden ənənəvi bank modelinin dəyişməyə ehtiyacı olduğunu düşünürdü. Onun fikrincə, köhnə banklar bahalı filiallar, mürəkkəb sistemlər və yavaş xidmət üzərində qurulmuşdu. Müştərilər isə daha sürətli, sadə və mobil həllər istəyirdi. Buna görə o, mövcud sistemi düzəltmək əvəzinə sıfırdan yeni bank yaratmağın daha doğru yol olduğuna qərar verdi.

2014-cü ildə Anne Boden “Starling Bank”ı qurdu. Məqsəd tam rəqəmsal, mobil əsaslı və istifadəçi yönümlü bank yaratmaq idi. Şirkət 2016-cı ildə Böyük Britaniyada bank lisenziyası aldı. Sonrakı illərdə fərdi və biznes müştərilər üçün xidmətlərini genişləndirdi. “Starling Bank” qısa müddətdə rəqəmsal bank sektorunun önəmli oyunçularından birinə çevrildi.

Yeni bank qurmaq asan olmadı. Anne Boden investorlardan çoxsaylı rədd cavabları aldı. Həm yeni bank yaratmaq ideyası, həm də fintech sahəsində qadın qurucu olması səbəbilə skeptik yanaşmalarla qarşılaşdı. Buna baxmayaraq, o, komandasını yenidən qurdu, investisiya cəlb etdi və layihəni davam etdirdi.

“Starling Bank” sonradan milyonlarla hesab açdı və Böyük Britaniyanın ən tanınan rəqəmsal banklarından biri oldu. Anne Boden 2023-cü ildə CEO vəzifəsindən ayrıldı, 2024-cü ildə isə idarə heyətindən çıxaraq yeni süni intellekt layihələrinə fokuslandı.

Mayya Hüseynova