20 ildir ABŞ-də yaşayan azərbaycanlı süni intellekt mütəxəssisi Bakıda seminar verdi

Valyuta.az-ın təşkilatçılığı ilə "Süni intellekt gündəlik həyatımızda" adlı seminar baş tutub.

Holberton Azərbaycan Məktəbində baş tutan seminarda ABŞ-da süni intellekt sahəsində fəaliyyət göstərən “flowlyst” şirkətinin təsisçisi Əziz Ağayev iştirakçılarla görüşüb.

Valyuta.az  xəbər verir ki, seminar zamanı süni intellekt texnologiyalarının yaratdığı imkanlar, biznesdə tətbiqi, əmək bazarına təsiri və gələcək trendlər barədə təqdimat keçirilib.

Əziz Ağayev çıxışında kompüter elmləri mütəxəssisi və alim Endru Nq-dən sitat verərərək bildirib ki, yaxın 5-10 il ərzində süni intellekt elektrik enerjisi kimi həyatın bütün sahələrinə inteqrasiya olunacaq. Onun sözlərinə görə, süni intellekt artıq əlavə üstünlük deyil, qlobal infrastrukturun vacib hissəsinə çevrilir.

Seminarda süni intellektin əmək bazarına təsiri məsələsinə də toxunulub. Təlimçi qeyd edib ki, AI insanların iş yerlərini birbaşa əvəz etməyəcək, lakin bu texnologiyalardan istifadə etməyi bacaran mütəxəssislər digərlərinə nisbətən daha böyük üstünlük qazanacaqlar.

Təqdimat zamanı dünyada süni intellektdən istifadə səviyyəsini əks etdirən statistik göstəricilər də iştirakçıların diqqətinə çatdırılıb. Bildirilib ki, dünya əhalisinin böyük hissəsi hələ də AI texnologiyalarından istifadə etmir, daha kiçik bir qrup isə ChatGPT, Claude və Gemini kimi alətlərin ödənişli versiyalarından yararlanır. Peşəkar AI əsaslı proqramlaşdırma alətlərindən istifadə edənlərin isə nisbətən azlıq təşkil etdiyi vurğulanıb. Çox sevindiricidir ki, təlimə iştirak edənlər arasında da bu azliq təşkil edən əhalinin arasında yer alanlar da var idi.
Seminarda müxtəlif sahələrdə tətbiq olunan süni intellekt alətləri barədə də məlumat verilib. Qeyd olunub ki, radiologiya və MRT sahəsində AI texnologiyalarının tətbiqi diaqnostika dəqiqliyinin artırılmasına və həkimlərin iş yükünün optimallaşdırılmasına imkan yaradır.

Bundan əlavə, Fireflies və Otter ai kimi platformaların görüşlərin avtomatik mətnə çevrilməsi və xülasələşdirilməsi üçün istifadə olunduğu, NotebookLM vasitəsilə isə sənədlərdən podkastlar, testlər və tədris materialları hazırlamağın mümkün olduğu diqqətə çatdırılıb.
Həmçinin iştirakçılara süni intellekt alətlərini gündəlik istifadə etməklə öyrənmək tövsiyə olunub. Əziz Ağayev bildirib ki, hər gün qısa müddət ərzində AI texnologiyalarına vaxt ayırmaq uzunmüddətli perspektivdə karyera və biznes inkişafına mühüm töhfə verə bilər.

Rəfiqə Abdin