Aİ iyundan sonra aviaşirkətlərdə mümkün fasilələr barədə xəbərdarlıq etdi

Avropa İttifaqının nəqliyyat üzrə komissarı Apostolos Tsitsikostas aviasiya reyslərində ciddi pozuntuların ola biləcəyi barədə xəbərdarlıq edib. Bu vəziyyət İranda davam edən münaqişə və Hörmüz boğazının bağlanması ilə əlaqələndirilir. 

Valyuta.az xəbər verir ki, bu barədə Almaniyanın DPA agentliyi məlumat yayıb.

“Vəziyyət ürəkaçan deyil”, deyə Tsitsikostas bildirib.

Onun sözlərinə görə, hazırda kifayət qədər yanacaq mövcuddur və hava limanlarının 80 faizindən çoxu çatışmazlıq barədə məlumat vermir. Lakin yanacağın qiyməti iki dəfədən çox artıb və bu, bir çox aviaşirkətin marşrutları dayandırmasına səbəb olub. Həmin marşrutlar artıq münaqişədən əvvəl də çətinliklə rentabelli idi.

Avrokomissarın əlavə etdiyinə görə, əgər Hörmüz boğazının blokadası davam edərsə və vəziyyət həll olunmazsa, yanacaq çatışmazlığı iyundan sonra yarana bilər.

Bununla belə, Tsitsikostas Avropada hazırda real defisit gözlənilmədiyini və fövqəladə hallar üçün ehtiyatların mövcud olduğunu bildirib.

Aİ üzv ölkələri mövcud ehtiyatlara nəzarəti gücləndirmək üçün yanacaq anbarları barədə gündəlik hesabat verməyə məcbur edilib.

Eyni zamanda, əgər iyundan sonra çatışmazlıq yaranarsa, bu ehtiyatların məqsədli şəkildə istifadə olunacağı qeyd edilir.

28 fevralda ABŞ və İsrail İran ərazisində “Epik Qəzəb” əməliyyatına başlayaraq ölkənin ali rəhbərliyinə qarşı zərbələr endirib. Hücumlar nəticəsində İranda raket və dron istehsalı obyektləri, hərbi anbarlar və digər infrastruktur hədəfə alınıb. Buna cavab olaraq Tehran rejimi qlobal neft tədarükünün bir hissəsinin keçdiyi Hörmüz boğazını blokadaya alıb.

Almaniyanın ən böyük aviaşirkəti "Lufthansa" isə bu yay qısa məsafəli 20 min reysin ixtisar ediləcəyini açıqlayıb. Şirkət bu addımı artan yanacaq qiymətləri ilə əlaqələndirib.

Paşa Məmmədli