"Samsung" Çində məişət texnikası və televizor satışını dayandıra bilər

"Samsung" Çin bazarında televizor və məişət texnikası satışını dayandırmağı müzakirə edir. Qərarın aprelin sonunadək qəbul oluna biləcəyi bildirilir.

Valyuta.az bu barədə "Reuters"ə istinadən xəbər verir.

Qeyd olunur ki, bu addım şirkətin Çində fəaliyyətini tam dayandırması demək deyil. "Samsung" ölkədəki istehsal müəssisələrini qorumağı planlaşdırır. Soyuducu, paltaryuyan və kondisioner istehsalı davam etdiriləcək, lakin bu məhsullar əsasən ixrac üçün yönləndirilə bilər.

Mümkün restrukturizasiyanın əsas səbəbi kimi Çin bazarında qiymət rəqabətinin kəskin zəifləməsi göstərilir. Yerli istehsalçılar daha ucuz və kifayət qədər keyfiyyətli məhsullar təklif edərək həm daxili, həm də xarici bazarlarda mövqelərini gücləndiriblər.

"Samsung" isə bildirib ki, şirkət qlobal biznes strukturunu mütəmadi olaraq yenidən qiymətləndirir və bazar şərtlərinə uyğun dəyişikliklər edir. Çində fəaliyyətlə bağlı yekun qərar hələ verilməyib. Satışların dayandırılması təsdiqlənərsə, proses ilin sonunadək mərhələli şəkildə həyata keçiriləcək.

Paşa Məmmədli