Azərkosmos 32 ölkədən 4,1 milyon dollar qazandı

2026-cı ilin yanvar-mart aylarında Azərbaycan Respublikasının Kosmik Agentliyi (Azərkosmos) 4,1 milyon ABŞ dolları dəyərində telekommunikasiya xidmətləri ixrac edib.

Valyuta.az xəbər verir ki, bu, ötən ilin eyni dövrü ilə müqayisədə 0,1 milyon ABŞ dolları və ya 2,5% artım deməkdir. Belə ki, 2025-ci ilin yanvar-mart aylarında ixracın həcmi 4 milyon ABŞ dolları olub.

Hesabat dövründə xidmətlər dünyanın 32 ölkəsindən olan 90-a yaxın şirkətə təqdim olunub. Ötən ilin eyni dövründə isə bu göstərici 39 ölkə olub ki, bu da ölkə sayında 7 vahid azalma deməkdir.

“Azərkosmos”un xidmət ixracından əldə etdiyi gəlirin ümumi gəlirlərdə payı da azalıb. Belə ki, bu göstərici cari ilin I rübündə 64% olduğu halda, ötən ilin eyni dövründə 65% təşkil edib. Bu isə 1 faiz bəndi azalma deməkdir.

Qeyd edək ki, 2025-ci ilin mart ayında “Azərkosmos” tərəfindən dünyanın 39 ölkəsinə 1,3 milyon ABŞ dolları dəyərində xidmət ixrac edilib.

Sərvanə Rəmixanova