Dronları düşüncə ilə idarə edən startap qurdu

Dara Tumenbayeva düşüncə gücü ilə dronların idarə olunmasına yönəlmiş “Black Swan” startapının təsisçisi və baş icraçı direktorudur. O, daha əvvəl “Amazon”, həmçinin İspaniya və Malayziyada fəaliyyət göstərən müxtəlif texnologiya şirkətlərində çalışıb.

Valyuta.az "TheTech"ə istinadən xəbər verir ki, startapın ideyası 2025-ci ilin martında yaranıb.

Layihənin məqsədi FPV dronların idarəetməsində insan səhvlərini azaltmaq və prosesi daha effektiv etməkdir. Bunun üçün EEG siqnallarından istifadə olunur. Sistem istifadəçinin diqqət, sakitlik və stress səviyyəsini müəyyən edərək dron idarəetməsinə inteqrasiya edilir.

İlk prototip diqqət yarışına əsaslanıb. İştirakçılar diqqətlərini qoruyaraq dronu müəyyən marşrut üzrə idarə ediblər. Bu yanaşma texnologiyanın praktiki imkanlarını nümayiş etdirib.

Dara bildirir ki, diqqətin ölçülməsində dəqiqlik 95%-ə qədər çatır. Lakin düşüncə əsaslı xüsusi əmrlərdə nəticələr hələ daha mürəkkəbdir və əlavə inkişaf tələb olunur.

Onun sözlərinə görə, ABŞ xüsusilə “DeepTech” sahəsində böyük imkanlar təqdim edir. Dünyada real rəqabət apara bilən texnologiya mərkəzləri əsasən ABŞ, Çin, qismən isə Avropa və Yaponiyadır. ABŞ-də investor şəbəkəsi, laboratoriyalar, startap proqramları və texniki istedadlar daha əlçatandır.

Rəqabətin çox güclü olduğu bu sahədə daim yeni startaplar yaranır. San-Fransisko proqram təminatı layihələrində önə çıxır. Avadanlıq sahəsində əsas rəqiblər isə daha çox ABŞ xaricində - Hindistan, Çin və İsraildə yerləşir.

Tumenbayeva qeyd edir ki, startapın ilk mərhələsində ailəsinin həm mənəvi, həm də maliyyə dəstəyi mühüm rol oynayıb. Onun sözlərinə görə, yaxınlarının inamı və dəstəyi layihənin inkişafında vacib amillərdən biri olub.

Hazırda əsas məqsəd layihənin inkişafı üçün 2 milyon dollara qədər “Pre-Seed” investisiyası cəlb etmək, daha sonra istehsal və miqyaslanma mərhələsinə keçməkdir.

Mayya Hüseynova