Müştərilər BOKT-lardan gündə 13,8 milyon manat kredit götürüb

Cari ilin ilk 3 ayının hesabatına görə, bank olmayan kredit təşkilatlarının (BOKT) cəmi aktivləri 1 milyard 471,4 milyon manat təşkil edib.

Valyuta.az xəbər verir ki, ötən ilin eyni dövründə bu göstərici 938,9 milyon manat olub. Bu isə illik müqayisədə 532,5 milyon manat və ya 56,71% artım deməkdir.

Cəmi aktivlərin əsas hissəsini müştərilərə verilən kreditlər formalaşdırıb. Belə ki, cari ilin I rübündə bu göstərici 1 milyard 238,3 milyon manat olub. Ötən ilin eyni dövründə isə 813 milyon manat təşkil edib. İllik müqayisədə BOKT-lar tərəfindən müştərilərə verilən kreditlərin məbləğində 425,3 milyon manat və ya 52,31% artımın olduğunu deməyə əsas verir.

BOKT-ların cəmi öhdəlikləri isə I rübdə 804,4 milyon manat olub. Ötən ilin eyni dövründə bu göstərici 517,1 milyon manat təşkil edib. Nəticədə illik müqayisədə öhdəliklərin məbləğində 287,3 milyon manat və ya 55,55% artım qeydə alınıb.

Cari ilin ilk 3 ayında müştərilərə verilən kreditlərin həcminin 1 milyard 238,3 milyon manat olduğunu nəzərə alsaq, bu 90 günlük dövr üzrə hesablandıqda gündə orta hesabla müştərilərə 13,8 milyon manat kreditin verilməsi deməkdir.

Sərvanə Rəmixanova