60-70 min dollar aralığında 844 min BTC alınıb

Kriptovalyuta bazarında son aylarda müşahidə olunan geriləməyə baxmayaraq, investorlar "Bitcoin"də aktiv şəkildə alışlarını davam etdirir.

Valyuta.az xəbər verir ki, zəncirüstü analiz platforması "Glassnode"un məlumatına əsasən, cari ilin 1 yanvar tarixindən etibarən 60-70 min dollar qiymət aralığında ümumilikdə 844 min 275 ədəd "Bitcoin" alınıb.

Məlumata görə, bu qiymət zonasında saxlanılan ümumi "Bitcoin" həcmi artıq təxminən 1,85 milyon ədədə çatıb. Bu isə dövriyyədə olan ümumi "Bitcoin" təklifinin 9,23%-ni təşkil edir.

Analitiklər bildirirlər ki, bu həcmdə alışlar 70 min dollar səviyyəsindən aşağı zonanı bazar üçün mühüm dəstək səviyyəsinə çevirib. "Glassnode"un qiymətləndirməsinə görə, 70 min dollar səviyyəsi artıq bazarda kritik psixoloji hədd kimi formalaşıb.

Qeyd edək ki, ABŞ və İran arasında əldə olunan atəşkəs razılaşmasından sonra "Bitcoin"in qiyməti qısa müddət ərzində 72 min dollar səviyyəsini keçib. Hazırda isə kriptovalyuta həmin səviyyəyə yaxın qiymətlərdə ticarət olunur.

Sərvanə Rəmixanova