ABŞ-da bir şəhər ora köçənlərə 15 min dollar təklif edir, amma vacib şərt var

ABŞ-ın Miçiqan ştatında yerləşən Detroyt şəhərinin hakimiyyəti əhalini və iqtisadiyyatı canlandırmaq məqsədilə yeni sakinlərin və investisiyaların cəlb olunmasına yönəlmiş genişmiqyaslı proqram həyata keçirir.

Valyuta.az "DailyMail"ə istinadən xəbər verir ki, "Detroytu evinə çevir" adlı təşəbbüs çərçivəsində seçilmiş iştirakçılara 15 min dollara qədər vəsait ödəniləcək. Ümumilikdə 500 min dollardan bir qədər artıq büdcə nəzərdə tutulduğundan proqram üzrə yerlər məhduddur və rəqabət yüksəkdir.

Təxminən 300 nəfərin seçilməsi planlaşdırılır və üstünlük sahibkarlara, eləcə də kiçik biznes sahiblərinə veriləcək.

Maddi dəstəyin məbləği müraciətin növündən asılı olacaq. Detroyta köçən uzaqdan işləyən şəxslərə köç xərclərini qarşılamaq üçün 1000 dollar veriləcək.

Artıq şəhərdə yaşayan və seçilən müraciətçilərə isə 15 min dollar təqdim olunacaq. Bu vəsait biznes və ya layihəyə investisiya, mənzil üçün ilkin ödəniş, ev təmiri və ya digər yaşayış subsidiyaları üçün istifadə edilə bilər. Eyni imkan Detroyta geri qayıdan keçmiş sakinlərə də şamil olunur.

"Biz artıq burada olanları qoruyacağıq, şəhəri tərk edənləri geri qaytaracağıq və dünyanın hər yerindən yeni nəsil qurucuları, yaradıcıları və sahibkarları cəlb edəcəyik", deyə “MoveDetroit” koalisiyasının rəhbəri Den Gilbert bildirib.

Detroyt uzun illər ABŞ-ın “avtomobil paytaxtı” kimi tanınıb və sənaye investisiyalarının mərkəzi olub. Lakin 2000-ci illərdə iri avtomobil istehsalçılarının iflası və ipoteka böhranı milyonlarla insanın şəhəri tərk etməsinə səbəb olub. İki onillikdən az müddət əvvəl şəhərdə hər beş evdən biri boş qalmış, müsadirə edilmiş daşınmaz əmlaklar isə cəmi 1 dollara satışa çıxarılmışdı.

Hazırda isə vəziyyət qismən yaxşılaşıb. Detroyt Polis Departamentinin məlumatına görə, qətl, ölüm olmayan atışma və avtomobil oğurluğu halları 2024-cü illə müqayisədə 15–30 faiz azalıb.

Eyni zamanda şəhərdə daşınmaz əmlak bazarında qiymətlər ABŞ-ın digər iri şəhərləri ilə müqayisədə xeyli aşağıdır. Detroytda ən bahalı evlər təxminən 720 min dollara satıldığı halda, ölkə üzrə orta qiymət 1,24 milyon dollar civarındadır.

Paşa Məmmədli