ABŞ-da texnologiya nəhəngini sarsıdan qərar: Sosial mediada uşaqlar necə hədəfə alınır?

"Meta" şirkəti ilə bağlı ortaya çıxan faktlar rəqəmsal dünyanın qaranlıq tərəfini yenidən gündəmə gətirib. 

Valyuta.az xəbər verir ki, ABŞ-də texnologiya nəhəngi ilə bağlı mühüm məhkəmə qərarı çıxarılıb və şirkətə 375 milyon dollar məbləğində cərimə tətbiq olunub.

Nyu-Meksiko ştatında keçirilən məhkəmə prosesində andlılar heyəti “Meta”nın “Facebook” və “Instagram” platformalarında uşaqların təhlükəsizliyi ilə bağlı istifadəçiləri yanlış məlumatlandırdığı və bu platformaları istismara açıq vəziyyətə gətirdiyi qənaətinə gəlib.

Mövzu ilə bağlı danışan məhkəmə-ekspertiza üzrə mütəxəssis, professor Əli Murad Kırık bildirib ki, sosial media uşaqlar və yeniyetmələr üçün ciddi təhlükəyə çevrilib. Onun sözlərinə görə, istifadəçilər bu platformalarda real kimliklərini gizlədərək anonim fəaliyyət göstərə bilir, foto və məlumatlar paylaşılır, qapalı qruplar vasitəsilə isə qanunsuz fəaliyyətlər həyata keçirilir.

Kırık qeyd edib ki, bu platformalarda uşaqların istismarı, qeyri-qanuni görüntülərin yayılması və hətta insan alveri ilə bağlı sövdələşmələrin aparıldığı halları aşkarlanıb.

“Uşaqların fiziki olaraq satışa çıxarılması, onların kommersiya obyektinə çevrilməsi, qeyri-etik foto və videoların paylaşılması, eləcə də qanunsuz razılaşmaların bu platformalar vasitəsilə həyata keçirildiyi müəyyən edilib”, deyə o vurğulayıb.

Ekspertin sözlərinə görə, bu cür problemlərin əsas səbəblərindən biri platformalarda ciddi təhlükəsizlik boşluqlarının mövcudluğudur. Yaş və şəxsiyyət təsdiqi mexanizmlərinin zəif olması uşaqların real yaşlarını gizlədərək platformalara daxil olmasına imkan yaradır.

Valideyn nəzarəti funksiyalarının kifayət qədər tətbiq olunmaması da vəziyyəti daha da ağırlaşdırır. Kırık hesab edir ki, platformalar istədikləri halda daha güclü yoxlama sistemləri tətbiq edə bilərlər, lakin bu sahədə kifayət qədər addım atılmır. Onun fikrincə, bəzi hallarda platformalar təhlükəsizlikdən çox gəlir əldə etməyə üstünlük verir.

Paşa Məmmədli