ABŞ və İran arasında atəşkəs xəbərləri fonunda fond bazarları yüksəlib

ABŞ və İranın Hörmüz boğazının yenidən açılmasını da əhatə edən iki həftəlik atəşkəs barədə razılığa gəlməsi fonunda Asiya bazarları və ABŞ fond fyuçersləri yüksəlib.

Valyuta.az xəbər verir ki, ABŞ xam nefti üzrə fyuçerslər 14,3% azalaraq bir barel üçün 96,83 dollara, beynəlxalq etalon sayılan “Brent” nefti isə 13,3% ucuzlaşaraq 94,74 dollara düşüb.

Neft qiymətləri müharibə səbəbindən Fars körfəzində hasilat və nəqlin pozulması fonunda artmışdı. Dünya bazarlarına çıxarılan neftin böyük hissəsi Hörmüz boğazından keçir, lakin İran həmin marşrutu düşmənləri üçün bağlamışdı.

Yaponiyanın əsas indeksi “Nikkei 225” 4,8%, Cənubi Koreyanın “Kospi” indeksi isə 5,6% artıb. ABŞ-da “S&P 500” fyuçersləri 2,3%, “Dow Jones” fyuçersləri isə 2% yüksəlib.