Az işləyib daha çox pul qazanmağın yolları - Kodi Sançezin fikirləri

Əgər özünüzü həddindən artıq işləyən, lakin az qazanan biri kimi hiss edirsinizsə, bu, çox güman ki, ambisiyanın çatışmazlığı deyil, hər gün təkrarladığınız kiçik və görünməz seçimlərin nəticəsidir. Bunu maliyyə eksperti, vençur kapitalisti və “Contrarian Thinking Capital” şirkətinin qurucusu Kodi Sançez deyir.

Onun sözlərinə görə, insanların əksəriyyəti daha ağıllı optimallaşdırmaq əvəzinə daha çox işləyir. Az işləyib daha çox qazanmağın sirri isə onun “mikro qərarlar” adlandırdığı anlayışı mənimsəməkdir.

Mikro qərarlar nədir?

Sançez bildirir ki, hazırda artıq nəsə sizin həyatınızı “idarə edir” və nə qədər pul qazandığınızı, nə qədər azadlığınızın olduğunu və irəliləyib-irəliləmədiyinizi müəyyən edir. Bu isə “avtopilot rejimində verdiyiniz kiçik, görünməz seçimlər” olan mikro qərarlardır.

Bunlara gündəlik təkrarlanan vərdişlər daxildir: səhər ilk iş olaraq e-poçtu yoxlamaq, sistem qurmaq əvəzinə planı dəyişmək və reaksiya vermək əvəzinə planlama aparmaq.

O, bunu hava limanındakı hərəkətli lentlə müqayisə edir: “Siz onun üzərinə çıxırsınız və ya sizi irəli aparır, ya da geri çəkir.”

Sançez qeyd edir ki, insanlar gündə təxminən 35 min qərar verir və onların əksəriyyəti avtomatik olur. O, insanları düşünməyə çağırır: gündəlik seçimləriniz sizi maliyyə baxımından irəli aparır, yoxsa geri çəkir?

Niyə ağır işin çoxu boşa gedir?

Əgər gündə 10–12 saat işləyirsiniz, amma yenə də irəliləyiş hiss etmirsinizsə, Sançezə görə bu, səylə deyil, fokusla bağlı problemdir.

“Təxminən nəticələrinizin 80%-i hərəkətlərinizin 20%-indən gəlir. Əksər insanlar isə adətən kiçik, darıxdırıcı, görünməz və gündəlik təkrarlanan yüksək təsirli fəaliyyətləri gözdən qaçırır.”

O əlavə edir ki, hətta səylərinizin cəmi 4%-i nəticələrinizin 60%-dən çoxunu təmin edə bilər.

Sançez “çox işləmək” mədəniyyətini ideallaşdırmır və Olimpiya üzgüçüsü Maykl Felpsin detallara obsesiv diqqətini nümunə göstərir: “Məsələ hər dörd ildən bir mükəmməl olmaq deyil, məhz bu an — məsələn, cümə günü günortadan sonra nə qədər mükəmməl olduğunuzdur.”

Onun əsas tövsiyəsi gəliri, yüksəlişi və ya kapitalı real şəkildə artıran kiçik davranışları müəyyən edib məhz onlara fokuslanmaqdır.

Məhsuldarlığınıza gizli “vergi”

Sançez xəbərdarlıq edir ki, mikro qərarları nəzərə almamağın ölçülə bilən bir qiyməti var: “Araşdırmalar göstərir ki, cəmi bir dəfə diqqətin yayındırılması sonrası tam fokuslanmaq üçün 23 dəqiqəyə qədər vaxt lazım olur.”

Eyni anda bir neçə işi görməyə çalışdıqda isə əslində enerjinizi və diqqətinizi bölür, nəticədə məhsuldarlığınızı və qazanc potensialınızı azaldırsınız.

O əlavə edir ki, bu cür diqqət yayındırıcı amillər maliyyəyə də təsir edir: “Araşdırmalara görə, orta insan ayda 314 dollar xərcləyir və bu alışların çoxunu xatırlamır. Bu isə ildə təxminən 4000 dollar edir.”

Milyardlıq şirkətləri quran mikro qərarlar

Mikro qərarların gücünü göstərmək üçün Sançez kiçik qərarları böyük üstünlüklərə çevirən şirkətləri nümunə gətirir.

Məsələn, “UPS” şirkəti marşrutlarını sol dönüşlərdən qaçacaq şəkildə yenidən quraraq yanacağa və vaxta qənaət edib, milyardlarla dollar əlavə gəlir əldə edib. “Southwest” yalnız bir tip təyyarədən istifadə edərək təlim və texniki xidmət xərclərini sadələşdirir. “Costco” isə gəlirinin böyük hissəsini təkrarlanan üzvlük haqlarından qazanır.

“Bir qərar — sonsuz pul axını və siz bunu belə düşünmürsünüz,” — deyə o qeyd edir.

Mikro çərçivə: təsiri necə qurmalı?

Sançez gündəlik işi yenidən qurmaq üçün beş addımlıq yanaşma təqdim edir:

1. Sürtünmə yaradan anı müəyyən edin
2. Ən kiçik təkrarlanan təsir nöqtəsini tapın
3. Lazımsız qərarları məhdudlaşdırın və ya aradan qaldırın
4. İşləyənləri gücləndirin
5. İşi daimi olaraq delegasiya və ya avtomatlaşdırma ilə ötürün

“Hər bir sistem sizin üçün işləyən səssiz bir əməkdaşdır.”

Yüksək gəlirli şəxslər üçün bu, məsələn, saat 11:00-a qədər e-poçta baxmamaq, görüşləri iki günə toplamaq və ya təkrarlanan cavablar üçün şablonlar yaratmaq demək ola bilər.

Vaxta qənaət üçün süni intellekt və köməkçilərdən istifadə

Sançez öz tövsiyələrini praktikada da tətbiq edir. O, vaxt qazanmaq üçün səsdən mətnə alətlərdən istifadə edir, köməkçilər işə götürür və cədvəllərlə vaxt itirmək əvəzinə məlumat panelləri qurmaq üçün süni intellekt əsaslı kodlaşdırma vasitələrindən yararlanır.

Onun fəlsəfəsinə görə, əgər bir işi avtomatlaşdırmaq, delegasiya etmək və ya sistemləşdirmək mümkündürsə, bu mütləq edilməlidir.

Niyə bu indi daha vacibdir?

Sançez hesab edir ki, bu mövzu indi daha da aktuallaşıb: “Biz diqqət böhranının ortasındayıq” — insanlar informasiya bolluğu və tez-tez kontekst dəyişməsi ilə üz-üzədir.

“Əgər diqqətinizi onu sizdən almağa çalışan bir dünyada necə qoruyacağınızı öyrənsəniz, daha çox pul qazanacaqsınız.”

Onun yekun fikri belədir: daha zəngin və ya daha ağıllı olmağa ehtiyac yoxdur — sadəcə daha yaxşı kiçik qərarlar vermək kifayətdir.

Tənzilə Ağabalayeva