Azərbaycanda investisiya üçün ən gəlirli sahələr hansılardır?

İnvestisiya gələcəyə atılan bir imza kimidir. Bəzən ehtiyatlı bir cizgi, bəzən isə cəsarətli bir addım. Azərbaycanda bu “imzanı” hara atmaq sualı hazırda hər kəsi düşündürür. Bazar artıq dünənki qədər sadə deyil, imkanlar isə hər küncdə fərqli bir simada qarşımıza çıxır. Bəziləri üçün qazanc hələ də “daş-divar” arasındadır.

Bəs bu günün reallığında hansı sahə həqiqətən pulu qazanclı bir gələcəyə çevirə bilər?

İqtisadçı Günay Hüseynova Valyuta.az-a bildirir ki, bu sahədə önəmli olan investisiyadan daha çox, tələb olunan yatırım edilən sahə haqqında məlumatın olmasıdır:

“Əvvəlki illərdə texnologiya bu qədər inkişaf etməmişdi. İstehlakçının hansısa məhsulu araşdırması üçün geniş mühit yox idi. Hazırda istehlakçı üçün əlverişli olsa da, sahibkar, investor üçün isə ikitərəflidir. Azərbaycanda investisiya etmək üçün gəlirli sahələrə qaldıqda, düşünürəm ki, enerji - neft, qaz və daşınmaz əmlak sektorudur. Həm riski az, həm də daha çox gəlirli hesab olunur”.

“Digər bir sahə isə turizm sektoru ola bilər. Bu sahə ölkəmizdə təəssüf ki, yetərli inkişaf etməyib. Turistin gəzib görəcəyi yer əsasən paytaxt Bakı olur, yerli vətəndaş isə bir dəfə getdiyi yerə ikinci dəfə getmək istəmir, olduqca yüksək qiymətlərdən. Bu sahədə tənzimləmə olarsa, olduqca gəlirli sahədir. Digər gəlirli sahə isə əsasən süni zəkaya bağlı olan sahələrdir. Daha çox texnologiyanın inkişafı ilə bağlı sahələr gəlirli hesab olunur. Lakin bu sahə ölkəmizdə inkişaf etməyib, yalnız idxal edirik”, - deyə iqtisadçı qeyd edir.

Tənzilə Ağabalayeva