Böhran zamanı niyə hamı qızıl alır? - İqtisadçı

Hamı qızıldan danışır, çünki böhran anında dolların, avronun və digər kağız pulların taleyi qeyri-müəyyənləşəndə, insanlar instinktiv olaraq qiymətli metallara üz tuturlar. Əslində, bu metal nə yeyilir, nə də bank hesabı kimi hər ay faiz qazandırır, lakin işlər pisləşəndə, hər kəsin güvəndiyi tək aktivə çevrilir. İqtisadi fırtınalar zamanı qızıl və digər metallar əsl canqurtaran halqası rolunu oynayır.

Bəs niyə böhran zamanı qızıl və digər qiymətli metallar daha güvənli liman hesab olunur?

İqtisadçı Kənan Quluzadə Valyuta.az-a bildirib ki, qızıl və digər qiymətli metalların böhran dövrlərində daha çox üstünlük qazanmasının bir neçə əsas səbəbi var:

“Qızıl fiziki aktiv olduğu üçün təhlükəsiz investisiya aləti hesab olunur və onun dəyəri dövlətlərin iqtisadi siyasətindən birbaşa asılı deyil. İnflyasiya artdıqca pulun alıcılıq qabiliyyəti zəifləyir, lakin qızıl adətən bahalaşır. Qeyri-müəyyənlik şəraitində investorlar riskli aktivləri sataraq daha etibarlı hesab etdikləri qızıla üstünlük verirlər”.

Kənan Quluzadə qeyd edib ki, qızıl tarixən uzunmüddətli dəyər qoruyucusu kimi qəbul olunur:

“Bank sisteminə inam azaldıqda o, alternativ maliyyə aləti kimi çıxış edir, valyuta devalvasiyası zamanı isə daha stabil qalır. Bundan əlavə, qızıl yüksək likvidliyə malikdir, yəni onu asanlıqla alıb-satmaq mümkündür”.

İqtisadçının fikrincə, mərkəzi bankların da ehtiyatlarında qızıl saxlaması bu aktivin etibarlılığını daha da gücləndirir.

Tənzilə Ağabalayeva