BOKT-ların xalis mənfəəti 45,5 mln. manat azalıb

2025-ci ildə bank olmayan kredit təşkilatları (BOKT) sektorunda mənfəət göstəricilərində azalma qeydə alınıb.

Valyuta.az xəbər verir ki, mənfəətlik kredit itkiləri üzrə ehtiyata ayırmaların artması nəticəsində sektorun xalis mənfəəti ötən ilin sonu ilə müqayisədə 29% (45,5 mln. manat) azalaraq 111,5 mln. manat təşkil edib.

Bununla yanaşı, sektorun aktivlərində artım müşahidə olunub. İl ərzində BOKT-lərin cəmi aktivləri 25% (250 mln. manat) artaraq 1,24 milyard manata çatıb. Aktivlərin artımında əsas pay xalis kredit portfelinin payına düşüb. Belə ki, xalis kredit portfeli 28,8% (206 mln. manat) artım göstərib.

Eyni dövrdə sektorun cəmi öhdəlikləri də yüksələrək 26,5% (142,4 mln. manat) artımla 679 mln. manata çatıb.

2025-ci ildə istehlak kreditləri BOKT-lərin kredit portfelində əsas yer tutmağa davam edib. Ümumi kredit portfeli il ərzində 29,5% (238,7 mln. manat) artaraq 1,05 milyard manat təşkil edib.

Digər tərəfdən, sektor üzrə qeyri-işlək kreditlərin (QİK) həcmində azalma müşahidə olunub. 2025-ci ildə qeyri-işlək kredit portfeli 4% azalaraq 108,5 mln. manat səviyyəsində qərarlaşıb.