Bu ölkə vətəndaşlarına pulsuz kompüterlər paylayacaq

Cənubi Koreya azgəlirli şagirdlər üçün pulsuz kompüter və noutbukların verilməsini nəzərdə tutan dəstək proqramını genişləndirəcək.

Valyuta.az xəbər verir ki, “PC Gamer”in məlumatına görə, hakimiyyət orqanları kompüter və noutbuk qiymətlərinin artması fonunda əhali üçün dəstək tədbirləri hazırlayır. Əsas addımlardan biri kimi azgəlirli şagirdlərin dövlət hesabına pulsuz noutbuk və kompüterlərlə təmin edilməsi planlaşdırılır.

Qərarın səbəbi kimi ölkədə kompüter texnikasının kəskin bahalaşması göstərilir. Rəsmi məlumatlara əsasən, kompüterlər üzrə istehlak qiymətləri indeksi 2025-ci ilin oktyabrında 4,3 faizdən 2026-cı ilin martında 12,4 faizə yüksəlib. Bu isə həssas qruplar arasında rəqəmsal bərabərsizliyin artmasına səbəb ola bilər.

Hökumət həmçinin operativ yaddaş, kompüter və noutbuk bazarlarında nəzarətin gücləndirilməsini, paralel olaraq isə texnikanın təkrar istifadəsi proqramının genişləndirilməsini planlaşdırır. Rəsmilərin hesablamalarına görə, hər il təxminən 80 min dövlət kompüteri istismar müddətini başa vurur, onlardan təxminən 22 mini utilizasiya edilir, halbuki bu cihazların bir hissəsi əsas ehtiyaclar üçün yenidən bərpa oluna bilər.

Bundan əlavə, ölkədə üç böyük mobil operatorun tariflərinin yenidən nəzərdən keçirilməsi də planlaşdırılır. Məqsəd trafik paketi bitdikdən sonra belə minimal internet çıxışını qorumaqdır. Bu tədbirin əsasən 65 yaşdan yuxarı vətəndaşlar daxil olmaqla təxminən 7,17 milyon nəfərə təsir edəcəyi gözlənilir.

Paşa Məmmədli