“Burger King” 10 ildən sonra ilk dəfə “Whopper”i dəyişir

“Burger King” məşhur “Whopper” burgerində son 10 ilə yaxın müddətdə ilk dəfə dəyişiklik edir. Şirkət bu addımın müştərilərin çoxsaylı müraciətlərindən sonra atıldığını açıqlayıb.

Valyuta.az xəbər verir ki, fast-food şəbəkələri menyularını tez-tez yeniləsə də, hər brendin simvolik məhsulu olur. “McDonald’s” üçün “Big Mac” nədirsə, “Burger King” üçün də “Whopper” odur.

Alovda qızardılmış kotlet, kahı, pomidor, soğan, turşu xiyar, ketçup və mayonezlə hazırlanaraq küncütlü bulkada təqdim edilən “Whopper” uzun illərdir brendin əsas məhsulu sayılır. Şirkət hətta müştərilərə birbaşa brend prezidenti Tom Kurtisə mesaj və ya zəng etmə imkanı da yaradıb.

“Whopper”də hansı dəyişikliklər edilib?

Şirkət açıqlayıb ki, burgerdə üç kiçik, lakin diqqətəlayiq yenilik tətbiq olunub:

Qablaşdırma dəyişir: “Whopper” artıq kağıza bükülmüş formada deyil, xüsusi qutuda təqdim olunacaq. Bu, burgerin formasının pozulmaması və içliklərin kənara axmaması üçün nəzərdə tutulub.

Bulkada yenilik: Bulkada keyfiyyət və dad baxımından təkmilləşdirmə edilib.

Mayonez yenilənib: Daha premium və zəngin dad üçün mayonezin tərkibi dəyişdirilib.

Burgerin əsas tərkibi - dörddəbir funtluq (quarter-pound) alovda qızardılmış mal əti kotleti, kahı, pomidor, soğan, turşu xiyar, ketçup və mayonez – dəyişməz qalır.

“Whopper bir ikonadır, ona görə də onu yenidən ixtira etmək niyyətində deyildik. Sadəcə müştərilərin birbaşa rəylərinə əsaslanaraq onu daha da təkmilləşdirdik”, - deyə şirkət prezidenti Tom Kurtis bildirib.

Sərvanə Rəmixanova