Çili və Argentina arasında nəhəng mis yatağı tapıldı - 70 il istehsal gücü var

And dağlarında son 30 ilin ən böyük mis yataqlarından biri aşkar edilib. 

Valyuyt.az-ın “ECONEWS”a istinadən məlumatına görə, kəşf o qədər böyükdür ki, ehtiyatlar 70 ildən çox fasiləsiz istehsalı təmin edə bilər.

Məlumata əsasən, yalnız “təsdiqlənmiş” ehtiyatlar təxminən 13 milyard kiloqram mis təşkil edir. Potensial ehtiyatlar da nəzərə alınarsa, bu rəqəm 25 milyard kiloqrama qədər artır.

Argentina və Çili sərhədində yeraltında milyardlarla kiloqram mis, həmçinin milyonlarla unsiya qızıl və gümüş ehtiyatının olduğu bildirilir. Bu resursların çıxarılması üçün “Lundin Mining” şirkəti iki yatağı – “Filo del Sol” və “Josemaria” layihələrini birləşdirməyi planlaşdırır ki, infrastruktur xərcləri azaldılsın.

Şirkətin prezidenti Cek Lundin bildirib: "Filo del Sol son 30 ildə yeni sahədə ən mühüm kəşflərdən biri olub".

Misin elektrik şəbəkələri, smartfonlar və elektrik avtomobilləri üçün əsas material olduğu qeyd edilir. Dünya tələbatı artdıqca, yataqların sayı azalır. Hesablamalara görə, 2040-cı ilə qədər misə olan tələbat 30% artacaq. Yeni yataq tam gücü ilə işləsə, ildə təxminən 400 milyon kiloqram mis istehsal edə bilər.

Argentina bu layihədən təxminən 69 milyard dollar vergi gəliri əldə edə bilər. Tikinti mərhələsində 5 500 iş yeri, xidmət sahələrində isə əlavə 19 000 iş yeri yaradılacağı gözlənilir.

"Biz böyük potensiala malik mədən rayonunun inkişafını davam etdirmək üçün güclü mövqedəyik", deyə Dave Diker bildirib.

Məlumatda qeyd olunur ki, filizin daşınması üçün ən yaxın şəhərdən 220 km uzunluğunda yolun yenilənməsi tələb olunur. Həmçinin, hasilat böyük su sərfiyyatı tələb edir. Yerli əhalinin içməli suyuna təsir etməmək üçün şirkətlər dəniz suyunun duzsuzlaşdırılması və suyun Çili tərəfdən təmin olunmasını planlaşdırır.

Paşa Məmmədli