Çində eyni anda 100 sürücüsüz taksi sıradan çıxdı

Çinin Uhan şəhərində 100-dən çox sürücüsüz taksi eyni vaxtda işləməyib, nəticədə bəzi sərnişinlər təxminən bir saat yarım müddətində nəqliyyat vasitələrinin içində qalıb.

Valyuta.az xəbər verir ki, hadisə ilə bağlı məlumatı “Oddity Central” yayıb. 

Məlumata görə, nasazlıq “Apollo Go” adlı avtonom taksi xidmətinə məxsus avtomobillərdə qeydə alınıb. Bu xidmət “Baidu” şirkəti tərəfindən inkişaf etdirilir.

Şahidlərin bildirdiyinə əsasən, bəzi sərnişinlər avtomobillərin qapılarını aça bilməyib, digərləri isə sıx yol hərəkəti və nəqliyyatın hərəkətsiz qalması səbəbindən yolun ortasında dayanmış maşınlardan çıxmağa ehtiyat ediblər.

Sərnişinlərdən biri bildirib ki, təxminən 90 dəqiqə boyunca robotaksi içində qalıb və dəstək xidməti ilə əlaqə saxlamaq çox çətin olub.

“Dəfələrlə zəng etdim, amma mənə yalnız mütəxəssis göndərildiyi deyildi. Saat 22:30-dan sonra isə kömək sorğusu tamamilə ləğv edildi və mən estakadada yük maşınlarının arasında qaldım”, deyə sərnişin qadın bildirib.

“Apollo Go” nümayəndələri ilkin açıqlamada hadisəyə sistem nasazlığının səbəb olduğunu bildiriblər, lakin əlavə detallar açıqlanmayıb.

Paşa Məmmədli