"Dolce & Gabbana"nın rəhbərliyindən getdi - Səhmlərini də satır

İtaliyanın dəbdəbəli moda evi olan “Dolce & Gabbana”nın həmtəsisçisi Stefano Qabbana şirkətin İdarə Heyətinin sədri vəzifəsindən ayrılıb. 

Valyuta.az xəbər verir ki, bu barədə "Bloomberg" agentliyi şirkət sənədlərinə istinadən məlumat yayıb.

Stefano Qabbana bu vəzifəni hələ dekabr ayında tərk edib. Yanvar ayında isə onun yerinə şirkətin digər həmtəsisçisi və baş icraçı direktoru Domeniko Dolçenin qardaşı Alfonso Dolçe təyin olunub. "Bloomberg"in mənbələrinə görə, Qabbana hazırda şirkətdəki 40 faizlik payını satmaq imkanlarını nəzərdən keçirir.

Məlumata əsasən, “Dolce & Gabbana” son dövrlərdə lüks məhsullara tələbatın azalması fonunda çətinliklərlə üzləşib. Bu vəziyyətin əsas səbəblərindən biri kimi Yaxın Şərqdəki münaqişənin gərginləşməsi göstərilir. Şirkətin mənfəəti azalıb və bu, borcların ödənilməsini də çətinləşdirib.

Kreditorlar şirkətin 450 milyon avro həcmində borcunun yenidən maliyyələşdirilməsi üçün 150 milyon avroya qədər vəsait cəlb etməyə çalışırlar. Bildirilir ki, moda evi maliyyə resurslarını artırmaq məqsədilə daşınmaz əmlak aktivlərinin satışını da nəzərdən keçirir.

Paşa Məmmədli