Dünyada ən çox satılan 10 smartfon - SİYAHI

2025-ci ilin dördüncü rübü üzrə "Apple" smartfonları qlobal bazarda üstünlüyünü qoruyub saxlayır. 

Valyuta.az xəbər verir ki, bu barədə "Counterpoint Research" şirkətinin yeni hesabatında bildirilir.

Hesabata görə, ən çox satılan on smartfon siyahısında "iPhone" modelləri beş mövqe tutub. Agentliyin məlumatına əsasən, dünyada ən çox satılan smartfon premium seqmentə aid olan "iPhone 17 Pro Max" olub. İkinci və üçüncü yerlərdə müvafiq olaraq "iPhone 17" və "iPhone 17 Pro" qərarlaşıb. Siyahıya həmçinin "iPhone 16" (4-cü yer) və "iPhone 16e" (8-ci yer) də daxil olub.

"Apple" üçün əsas rəqib olaraq "Samsung" qalır. Şirkət əsasən "Galaxy A" seriyasının daha əlçatan modelləri hesabına siyahıda dörd mövqe tutub. Daha bir yer isə büdcə seqmentində olan "Redmi" smartfonu ilə "Xiaomi"yə məxsusdur. "Galaxy S25" isə ilk onluqda yer alan yeganə premium "Android" əsaslı cihazdır.

Analitiklərin məlumatına görə, ən çox satılan bu on smartfon rüb ərzində qlobal satışların təxminən 23 faizini təşkil edib. Təkcə "iPhone 17 Pro Max" modelinin payı isə təxminən 5 faiz olub.

Mütəxəssislər qeyd edirlər ki, "Apple" xüsusilə premium seqmentdə lider mövqeyini sabit şəkildə qoruyur. Rəqiblər isə əsasən daha münasib qiymətli modellərlə uğur qazanırlar.

Məlumata görə, yeni "iPhone" modelləri ənənəvi olaraq sentyabr ayında təqdim olunur. "Reuters"in yaydığı xəbərə əsasən, bu payızda "Apple" "iPhone 18 Pro", "iPhone 18 Pro Max" və qatlanan "iPhone" modelini təqdim edəcək. Bundan təxminən yarım il sonra – 2027-ci ilin yazında isə "iPhone 18", "iPhone 18e" və ehtimal ki, "iPhone Air 2" elan olunacaq.

Digər tərəfdən, fevral ayının sonunda "Samsung" "Galaxy S26" flaqman seriyasını təqdim edib. "Ultra" modeli stilus dəstəyini qoruyub saxlayıb, "anti-şpion ekran" funksiyası və regiondan asılı olaraq "Snap 8 Elite Gen 5" və ya "Exynos 2600" çipseti ilə təchiz olunub. "S26" və "S26+" modelləri də yeni prosessorlar əldə etsə də, onların ekranlarında anti-şpion funksiyası yer almayıb.

Paşa Məmmədli