"Instagram" yeni funksiyanı istifadəyə verdi

"Instagram" istifadəçilərin uzun müddətdir gözlədiyi yeni funksiyanı təqdim edib. Artıq platformada yazılan şərhləri silmədən redaktə etmək mümkün olacaq.

Valyuta.az xəbər verir ki, yeni xüsusiyyətə əsasən istifadəçilər paylaşdıqları şərhləri 15 dəqiqə ərzində istədikləri qədər düzəldə bilərlər. Redaktə olunmuş şərhlərin yanında isə şəffaflığı təmin etmək üçün “düzəldildi” qeydi görünəcək.

Funksiyadan istifadə olduqca sadədir. İstifadəçilər öz şərhlərinə toxunduqdan sonra açılan menyudan “redaktə et” seçimini etməklə dəyişiklikləri həyata keçirə bilirlər. Bildirilir ki, yenilik həm iOS, həm də Android istifadəçiləri üçün mərhələli şəkildə aktivləşdirilir və əvvəlcədən məhdud auditoriyada test olunub.

Yeniləmə əsasən yazı səhvləri, natamam ifadələr və ya yanlış anlaşılan fikirlərə görə yaranan “sil və yenidən yaz” problemini aradan qaldırmağı hədəfləyir.

Bununla yanaşı, şərhlərin sonradan dəyişdirilməsi bəzi hallarda müzakirələrin kontekstini dəyişə bilər. Bu riski azaltmaq üçün "Meta" “düzəldildi” etiketi ilə istifadəçilərə şəffaflıq təqdim edir.

Qeyd edək ki, bu addım "Meta"nın platformada istifadəçi aktivliyini artırmaq strategiyasının bir hissəsi kimi qiymətləndirilir.

Sərvanə Rəmixanova