İş proseslərində süni intellekt dövrü: Səmərəlilik 60 faizə qədər arta bilər

Şirkətlərdə satınalma prosesindən istehsal planlaşdırılmasına qədər bir çox sahədə yol verilən səhvlər maliyyə itkilərinə səbəb olur. 

Valyuta.az xəbər verir ki, “KOBİ AI” şirkətinin qurucusu Baran Kaya süni intellektin bu proseslərdəki rolunu izah edib.

Şirkətlərdə müşahidə olunan maliyyə itkilərinin əsas səbəbi adətən insan səhvinə açıq olan əməliyyat prosesləridir. Satınalma, xərclərin hesablanması və istehsal planlaşdırılması kimi sahələrdə edilən kiçik yanlışlıqlar zamanla böyük xərclərə çevrilir.

Baran Kaya bildirib ki, bu mərhələdə tətbiq olunan süni intellekt sistemləri məlumatları analiz edərək səhv ehtimalını minimuma endirir. Xüsusilə məhdud resurslarla fəaliyyət göstərən kiçik və orta bizneslər (KOB-lar) üçün bu amil birbaşa rəqabət qabiliyyətinə təsir edir.

Müəssisələrin gündəlik fəaliyyətində anbar (stok) idarəetməsi və satınalma qərarları mühüm əhəmiyyət daşıyır. Kaya qeyd edir ki, minlərlə məhsulun stokunun izlənməsi zamanı tələb dəyişiklikləri və təchizat müddətləri kimi amillər insan üçün çətinlik yaradır. Səhv planlaşdırma nəticəsində nağd pul axını və ya satış imkanları zərər görə bilər. Süni intellekt isə keçmiş məlumatları və sifariş tendensiyalarını saniyələr ərzində analiz edərək daha məntiqli qərarların qəbuluna şərait yaradır. İstehsal xəttində baş verən avadanlıq nasazlıqları və ya sifariş ləğvləri kimi ani dəyişikliklər zamanı sistemlər qısa müddətdə yeni fəaliyyət planı formalaşdırır.

Xərclərin hesablanması da səhv ehtimalının yüksək olduğu digər sahələrdən biridir. Logistikadan valyuta məzənnəsinə qədər bir çox amilin eyni anda qiymətləndirilməsi texnoloji dəstək vasitəsilə daha asan olur. Kaya vurğulayıb ki, süni intellekt emosiyalardan uzaq, tamamilə məlumatlara əsaslanan qərarlar verdiyi üçün intuitiv yanaşmalardan daha balanslı nəticələr təqdim edir. Satış komandaları da müştəri tarixi və qiymət həssaslığı kimi məlumatlara əsaslanaraq daha strateji təkliflər hazırlaya bilir.

Süni intellekti yalnız fərdi köməkçi kimi deyil, iş proseslərinin əsas hissəsinə çevirmək vacibdir. Baran Kayanın sözlərinə görə, bu inteqrasiyanı həyata keçirən şirkətlərdə səmərəlilik artımı 30 faizdən 60 faizə qədər dəyişir. Texnologiyanın öyrənən strukturu onu erkən tətbiq edən müəssisələrə uzunmüddətli üstünlük qazandırır. Gələcəkdə rəqabətin əsas meyarı məlumatı ən düzgün şəkildə emal edən və sistemlərinə inteqrasiya edən şirkətlər olacaq.

Paşa Məmmədli