Kosmos iqtisadiyyatına istiqamət verən 10 startap - Milyardlıq investisiyalar

Kosmos artıq yalnız dövlətlərin nəzarətində olan sahə deyil - yeni nəsil startaplar bu sahəni həm istehsal, həm logistika, həm də texnologiya baxımından böyük iqtisadi platformaya çevirir.

Valyuta.az xəbər verir ki, orbitdə dərman istehsalından tutmuş peyk xidmətlərinə, Ayda otel tikintisindən kosmik məlumat mərkəzlərinə qədər fəaliyyət göstərən şirkətlər kosmos iqtisadiyyatının sərhədlərini sürətlə genişləndirir.

Above

ABŞ-ın Alabama ştatında yerləşən bu şirkət kosmosda yaşayış və iş platformaları qurmağı hədəfləyir. Müştərilərə öz texnologiyalarını orbitə çıxarmaq imkanı yaradır və missiyaların planlaşdırılmasından icrasına qədər dəstək verir.

Şirkətin bu günə qədər cəlb etdiyi investisiya 3,1 milyon dollar təşkil edir. Uzunmüddətli məqsəd süni cazibə qüvvəsinə malik kosmik stansiyalar yaratmaqdır.

Aetherflux

Bu startap kosmosda istehsal olunan günəş enerjisini Yerə ötürmək üçün texnologiyalar hazırlayır. Son dövrlərdə isə fəaliyyətini kosmosda məlumat mərkəzlərinə yönəldib.

Şirkət indiyədək təxminən 80 milyon dollar investisiya cəlb edib və yeni maliyyələşmə mərhələsində dəyərinin 2 milyard dollara çatdırılması planlaşdırılır.

GRU Space

Ayda ilk otelin tikintisini planlaşdıran şirkət artıq Ay səthində istifadə üçün material istehsal edən texnologiyalar hazırlayıb.

Layihəyə əsasən, ilk Ay otelinin 2032-ci ildə istifadəyə verilməsi, rezervasiya üçün isə 1 milyon dollar depozit tələb olunacağı bildirilir.

K2 Space

Daha iri və güclü peyklər hazırlayan şirkət 2026-cı ildə ilk “mega sinif” peykini orbitə çıxarıb.

Şirkət bu günə qədər ümumilikdə 425,5 milyon dollar investisiya alıb və son qiymətləndirmə ilə dəyəri 3 milyard dollara çatıb.

Northwood Space

Kosmik rabitə üçün yer stansiyaları şəbəkəsi quran şirkət bu sahədə “bulud əsaslı” infrastruktur yaratmağı hədəfləyir.

Şirkət müxtəlif mərhələlərdə ümumilikdə 136,4 milyon dollar investisiya cəlb edib.

Outpost

Yenidən istifadə oluna bilən kosmik aparatlarla yük daşımalarını sürətləndirməyi planlaşdırır. Məqsəd 60 dəqiqə ərzində dünyanın istənilən nöqtəsinə yük çatdırmaqdır.

Şirkət ilkin mərhələdə 7,1 milyon dollar investisiya alıb, əlavə olaraq dövlət proqramları çərçivəsində 33,2 milyon dollarlıq müqavilə əldə edib. Ümumi maliyyələşmə 37 milyon dolları ötür.

Space Forge

Kosmos şəraitində yüksək keyfiyyətli yarımkeçirici materiallar istehsal edən şirkət bu texnologiyanı Yerə gətirərək sənayedə istifadə etməyi planlaşdırır.

Şirkət indiyədək ümumilikdə təxminən 63 milyon dollar investisiya cəlb edib.

Starfish Space

Uydu servis xidmətləri təqdim edən bu şirkət peyklərin ömrünü uzatmaq və onların idarəsini optimallaşdırmaq üçün texnologiyalar hazırlayır.

Şirkətin cəlb etdiyi investisiyanın həcmi 50 milyon dolları ötüb.

Starcloud

Kosmosda məlumat mərkəzləri quraraq süni intellekt və məlumat emalını orbitə çıxarmağı hədəfləyir.

Şirkət 200 milyon dollar investisiya cəlb edib və hazırda bazar dəyəri 1,1 milyard dollar səviyyəsində qiymətləndirilir.

Varda Space Industries

Kosmosda dərman istehsalı və bu məhsulların Yerə qaytarılması texnologiyaları üzərində çalışan şirkət artıq bu sahədə uğurlu sınaqlar həyata keçirib.

Şirkət ümumilikdə 329 milyon dollar investisiya cəlb edib.

Sərvanə Rəmixanova