Orta aylıq nominal əməkhaqqı 55 manat artıb

Bu ilin yanvar-fevral aylarında Azərbaycanda muzdla çalışan işçilərin orta aylıq nominal əməkhaqqısı 1 099 manat təşkil edib.

Valyuta.az xəbər verir ki, əvvəlki ilin müvafiq dövrü ilə müqayisədə 5,3% və ya 55 manat artım olub.

Orta aylıq nominal əməkhaqqı iqtisadiyyatın mədənçıxarma sənayesi, maliyyə və sığorta fəaliyyəti, informasiya və rabitə, peşə, elmi və texniki fəaliyyət, eləcə də nəqliyyat və anbar təsərrüfatı sahələrində daha yüksək olub.

2026-cı il martın 1-nə ölkədə muzdla çalışan işçilərin sayı 1 milyon 784 min nəfər təşkil edib. Onlardan 870,6 min nəfəri dövlət sektorunda, 913,4 min nəfəri isə qeyri-dövlət sektorunda fəaliyyət göstərib.

Muzdla çalışan işçilərin 18,5%-i ticarət və nəqliyyat vasitələrinin təmiri, 18,3%-i təhsil, 13,8%-i sənaye, 8,6%-i səhiyyə və sosial xidmətlər, 6,5%-i tikinti, 6,1%-i dövlət idarəetməsi və müdafiə, sosial təminat, 4,4%-i nəqliyyat və anbar təsərrüfatı, 4%-i peşə, elmi və texniki fəaliyyət, 2,4%-i maliyyə və sığorta fəaliyyəti, 2,3%-i kənd təsərrüfatı, meşə təsərrüfatı və balıqçılıq sahələrində çalışıb. Qalan 15,1% isə iqtisadiyyatın digər sahələrinin payına düşüb.