Ötən il bank sektoru 223 milyon manatlıq qeyri-işlək krediti silib

2025-ci il ərzində bank sektorunda kredit riskləri ümumilikdə sabit qalsa da, qeyri-işlək kreditlərin (QİK) həcmində artım müşahidə olunub. Hesabat dövründə qeyri-işlək kredit portfeli 16,4% və ya 107 milyon manat artaraq 763 milyon manata çatıb.

Valyuta.az xəbər verir ki, artım əsasən istehlak və biznes kreditləri hesabına formalaşıb.

Belə ki, qeyri-işlək istehlak kreditləri 58 milyon manat, biznes kreditləri isə 54 milyon manat artıb. Eyni zamanda, ipoteka kreditləri üzrə qeyri-işlək portfeldə 5 milyon manat azalma qeydə alınıb.

Hesabat ilində bank sektoru üzrə ümumilikdə 223 milyon manat məbləğində kredit silinməsi həyata keçirilib. Silinmələrin əsas hissəsi istehlak kreditlərinin payına düşüb. Belə ki, ümumi silinmələrin 60,9%-i və ya 135,8 milyon manatı istehlak portfeli, 37,8%-i və ya 84,2 milyon manatı isə biznes portfeli üzrə olub.