"Qızıl ən yaxşı sərmayə deyil"

İnsanlar həmişə sabahını təmin etmək istəyir. Bu səbəbdən, sərmayə qərarları getdikcə daha çox gələcəyə yönümlü xarakter alır. Bir çox insana görə qızıl gələcəyə ən yaxşı sərmayə sayılır.

Bəs həqiqətən qızıl gələcək üçün etibarlı sərmayədirmi?

İqtisadçı Eldəniz Əmirov Valyuta.az-a bildirib ki, ümumiyyətlə, qızıl gələcəyə dair ən yaxşı sərmayə deyil, ən etibarlı sərmayədir:

“Qızıla yatırılan investisiya uzunmüddətli dövrdə risk baxımından sıfıra yaxın risk daşıyır, yəni təhlükəsizlik baxımından demək olar ki, risksizdir. Buna görə də uzunmüddətli perspektivdə qızıla yatırılan investisiya ən etibarlı hesab olunur, lakin ən yaxşı deyil. Qızıl ona görə etibarlıdır ki, zaman keçdikcə dəyər qazanır və heç vaxt dəyərini itirmir. Qısamüddətli dövrlərdə qiymət enişləri baş verə bilər, lakin uzunmüddətli dövrdə dəyər itkisi baş vermir. Qızılın ən yaxşı sərmayə sayılmamasının səbəbi isə ondadır ki, məsələn, bu gün 100 qram qızılınız varsa, 10 il sonra da həmin qızıl yenə 100 qram olaraq qalacaq. Onun qazancı yalnız qiymət artımı hesabına formalaşır. Ən yaxşı sərmayə isə zamandan və istiqamətlərdən asılı olaraq dəyişir. Buna görə də qızıla gələcək üçün ən yaxşı sərmayə demək olmaz, lakin onu ən aşağı riskli və etibarlı sərmayə kimi qiymətləndirmək olar”.

Tənzilə Ağabalayeva