Robert Kiyosaki investorları səhmlərlə bağlı gözlənilənlər barədə xəbərdar edib

Maliyyə sahəsində mütəxəssis və müəllif Robert Kiyosakinin səsi, iqtisadiyyatın və xüsusilə də dünyanın aparıcı səhm bazarlarının gələcəyi ilə bağlı artan pessimist proqnozlar fonunda son vaxtlar daha çox diqqət çəkir.

"X" platformasında paylaşdığı yazıda "Rich Dad Poor Dad" kitabının müəllifi əvvəlcə 2013-cü ildə nəşr olunan "Rich Dad’s Prophecy" kitabında verdiyi xəbərdarlığı bir daha təkrarlayaraq səhm bazarlarını nə gözlədiyini açıqlayıb.

Kiyosaki: "BlackRock"un “özəl kredit Ponzi sxemi” səhm bazarında çökməyə səbəb olacaq.

Onun proqnozuna görə, gözlənilən səhm bazarı çöküşü artıq qapımızdadır. Bu vəziyyətin əsas səbəbkarı isə "BlackRock" şirkətidir — daha dəqiq desək, bu çoxmillətli investisiya şirkətinin “özəl kredit Ponzi sxemi”.

Maliyyə eksperti fikirlərini geniş izah etməsə də, ehtimal olunur ki, bu açıqlamalar "Reuters" kimi mənbələrin yaydığı son xəbərlərlə bağlıdır. Həmin xəbərlərə görə, "BlackRock" çoxsaylı geri çəkilmə tələblərindən sonra əsas borc fondlarından birində vəsait çıxarılmasına məhdudiyyət tətbiq edib. Bu addım isə təxminən 2 trilyon dollar dəyərində olan özəl kredit bazarı ilə bağlı narahatlıqların artdığı bir dövrdə investorları təşvişə salıb.

Kiyosaki bildirib ki, "BlackRock"un mümkün çökməsi sürətli olacaq və qlobal bazarlara ciddi zərər vuracaq. O əlavə edib ki, “baby boomer” nəslinə aid pensiya fondları dünya üzrə “tamamilə silinə bilər”. Təhlükəsiz alternativ axtaranlara isə qiymətli metallar, kriptovalyutalar və “real neft quyularında tərəfdaşlıqlar”a investisiya etməyi tövsiyə edib.

Kiyosaki: Hər büdcəyə uyğun investorlar gümüşlə kiçikdən başlaya bilər
Kiyosaki çıxışının sonunda fiziki gümüşün üstünlüklərini vurğulayıb. Xüsusilə “junk silver” kimi tanınan, tərkibində yüksək miqdarda gümüş olan dövriyyədəki sikkələrin bu gün nominal dəyərindən xeyli baha olduğunu qeyd edib.

“Mən gümüşü sevirəm, çünki hətta 2026-cı ildə belə, əgər 10 dollarınız varsa, qızıl və gümüş satıcısına gedərək 10 dollarlıq real ‘junk’ gümüş ala bilərsiniz... və sizi uzunmüddətli müştəri kimi görmək istəyən satıcıdan dəyərli maliyyə bilikləri əldə edə bilərsiniz”, — deyə Kiyosaki yazıb. O həmçinin, bəzən bir-iki yeməkdən imtina edərək qiymətli metallar portfelini artırmağın faydalı ola biləcəyini vurğulayıb.

Tənzilə Ağabalayeva