Roma və Parisi kölgəsində qalan, amma güclü təəssürat yaradan 5 Avropa şəhəri

Turistlər məşhur paytaxtlara axın edərkən, bu məkanlar kölgədə qalır, baxmayaraq ki, daha çox dinamika və orijinallıq təklif edir. 

Valyuta.az "Travel Off Path"a istinadən xəbər verir ki, Avropanın 40-dan çox ölkəsini gəzmiş bir səyahətçi böyük şəhərlərin kölgəsində qalan, lakin daha güclü təəssürat yarada bilən 5 şəhəri seçib.

Triyest, İtaliya

Müəllifin fikrincə, bu şəhər Roma, venesiyalılar, slavyanlar və avstriyalıların təsiri sayəsində İtaliyanın ən çoxşaxəli memarlıq nümunələrindən birinə sahibdir.

Burada eramızdan əvvəl 33-cü ilə aid “Arco di Riccardo” antik tağı müasir binaların içində sanki “əridilib”. “Canal Grande”dəki qayıqlar Venesiya ab-havasını xatırladır, “Piazza Unità d’Italia” isə dəniz mənzərəli Avropanın ən böyük meydanlarından biridir.

Səhər espresso üçün “Caffè San Marco” ideal məkan sayılır. Triyest mətbəxi isə ənənəvi İtalyan kulinariyasından xeyli fərqlənir.

“Bu mətbəx Aralıq dənizi üslubundan daha çox sloven və xorvat mətbəxini xatırladır”, deyə müəllif qeyd edir.

Zaltsburq, Avstriya

Motsartın vətəni və “Musiqinin səsi” filminin çəkildiyi şəhər “açıqca kimi” görünüşü ilə seçilir. Vyanadan fərqli olaraq, Zaltsburqda sakit və kiçik şəhər atmosferi qorunub saxlanılıb. Bəstəkarın doğulduğu Getreidegasse 9 küçəsi pastel rəngli evləri ilə diqqət çəkir.

Mirabel bağları isə möhtəşəm fəvvarələri ilə “Do-Re-Mi” melodiyasını xatırladır.

Qlazqo, Şotlandiya

Əsl dinamika axtaranlar üçün Qlazqo Edinburqu belə geridə qoya bilər. Vest-End antik mağazaları və Qlazqo Universitetinin qotik memarlığı ilə seçilir. Gecə həyatı üçün “Rascal” və “Hillhead Bookclub” tövsiyə olunur. Ashton Lane isə işıqlı, daş döşəməli romantik gəzinti küçəsidir.

Şəhərin metrosu “Mexaniki portağal” adlanır və yalnız iki dairəvi xəttdən ibarətdir.

“Əslində bu çox rahatdır, çünki sərxoş olub dayanacağı ötürsən belə, yenidən dövrə vurub düzgün stansiyada düşə bilərsən”, deyə jurnalist qeyd edir.

Lill, Fransa

Parisdən cəmi bir saatlıq məsafədə yerləşən Lill flaman ruhunu qoruyub saxlayan bir şəhərdir. Burada Şarl de Qoll doğulub.

"Grand Place" meydanı gildiya binaları ilə Brüsseli xatırladır və Fransanın ən gözəl meydanlarından biri sayılır. Vieille Bourse XVII əsr binasında kitab bazarları, həmçinin Vauban qalası görməli yerlərdəndir.

Axşam üçün Rue Royale və ya Place Louise de Bettignies küçələri ideal seçimdir.

Saloniki, Yunanıstan

Saloniki Afina enerjisini Egey dənizi mənzərəsi ilə birləşdirir. Ağ Qüllə və Ano Poli köhnə şəhər labirintləri Osmanlı dövründən qalan memarlıqla unikal atmosfer yaradır.

Şəhər mərkəzindən Roma və Bizans dövrünə aid tarixi qalıqlar görünür. Lakin müəllifə görə, Salonikinin əsas üstünlüyü yemək mədəniyyətidir:

“İstər ucuz buqatsa, istərsə sahil tavernalarında verilən mükəmməl ahtapot olsun – bu şəhər ciddi pəhriz üçün uyğun deyil”.

Paşa Məmmədli