"Silikon vadi"sinə qısa yol: İRİA müraciətlərin qəbuluna başladı

İnnovasiya və Rəqəmsal İnkişaf Agentliyi (İRİA) yerli startapların beynəlxalq bazarlara çıxışını dəstəkləmək məqsədilə GOAL (Global Overseas Acceleration & Learning) proqramına müraciətlərin qəbuluna başladığını açıqlayıb.

Valyuta.Az xəbər verir ki, proqram dünyanın aparıcı innovasiya platformalarından biri olan “Plug and Play” ilə strateji tərəfdaşlıq çərçivəsində həyata keçirilir. Təşəbbüs yerli startapların qlobal ekosistemə inteqrasiyasını sürətləndirməyi hədəfləyir.

Bildirilib ki, proqram çərçivəsində seçilmiş startaplar üçün bir sıra imkanlar yaradılacaq. Bunlara ABŞ-ın Silikon Vadisində praktiki təcrübə əldə etmək, beynəlxalq vençur kapital fondları, korporativ şirkətlər və sənaye ekspertləri ilə birbaşa əlaqələr qurmaq, həmçinin dünya səviyyəli mütəxəssislər tərəfindən mentorluq və təlimlərdə iştirak daxildir.

Məlumata əsasən, ilkin mərhələdə proqram üzrə cəmi 6 startapın seçilməsi planlaşdırılır. Seçilən komandalar innovasiya mühitində bilik və bacarıqlarını inkişaf etdirməklə yanaşı, layihələrini qlobal bazarlara çıxarmaq imkanı əldə edəcəklər.

Agentlik startap nümayəndələrini proqramda iştirak etmək üçün müraciət etməyə çağırıb. Qeyd olunub ki, bu təşəbbüs yerli innovasiya ekosisteminin beynəlxalq səviyyədə rəqabət qabiliyyətinin artırılmasına xidmət edir.

Proqramla bağlı ətraflı məlumat və müraciət üçün “Plug and Play” platformasının rəsmi internet səhifəsinə daxil olmaq mümkündür.

Aydın