Sumqayıtda 1242 mənzilli yarımçıq tikili hərraca çıxarılır - QİYMƏTLƏR

Aprelin 21-də Sumqayıt şəhərində tikintisi dondurulan və başa çatdırılmayan iri yaşayış kompleksi hərraca çıxarılacaq.

Valyuta.az xəbər verir ki, söhbət 1242 mənzildən ibarət yaşayış kompleksinin yarımçıq tikilisindən gedir.

Obyekt şəhərin Xovlu İplik Fabrikinin cənub hissəsində yerləşir. Layihənin sifarişçisi Azərbaycan Respublikasının Qaçqınların və Məcburi Köçkünlərin İşləri üzrə Dövlət Komitəsidir.

Özəlləşdirilməsi nəzərdə tutulan torpaq sahəsinin ümumi ərazisi 30 000 kvadratmetr təşkil edir.

Əmlakın ilkin satış qiyməti 13 370 000 manat, torpaq sahəsinin ilkin satış qiyməti isə 1 500 000 manat müəyyən edilib. Beləliklə, hərraca çıxarılan obyekt üzrə ümumi ilkin satış qiyməti 14 870 000 manat təşkil edir.

Hərracda iştirak etmək üçün tələb olunan 10 faiz beh məbləği 1 487 000 manatdır.

Qeyd edək ki, obyekt tikintisi normativ müddətdən artıq gecikmiş və tamamlanmamış layihələr kateqoriyasına daxildir.

Mayya Hüseynova